Një bebe në Mbretërinë e Bashkuar ka ardhur në jetë nga një nënë, mitra e së cilës ishte e transplantuar.
Grace Davidson kishte lindur me mitër jo funksionale dhe në vitin 2023 motra i dhuroi mitrën, çka asokohe shënoi transplantin e vetëm të suksesshëm të mitrës në Mbretërinë e Bashkuar.
Dy vite pas operacionit, 36-vjeçarja lindi vajzën në muajin shkurt, raporton BBC. Ajo dhe bashkëshorti, Angus i vendosën vajzës emrin Amy, si tezja e saj që dhuroi mitrën.
Grace përshkruan me emocion momentin kur mori Amy në krahë, e cila peshonte vetëm 2 kilogramë, por për të ishte “e pabesueshme” dhe “surreale”. “Ishte e jashtëzakonshme sepse s’e kishim lejuar kurrë veten të imagjinonim sesi do të ndiheshim kur ajo të vinte. Është vërtet e mrekullueshme”.
Grace dhe Angus shpresojnë që falë mitrës së transplantuar ata mund të bëjnë një fëmijë të dytë.
Ekipi i kirurgëve tha për BBC se pas transplatit të Grace, kanë realizuar edhe tre të tjerë përmes dhuruesve që kanë ndërruar jetë. Synimi i tyre është të kryejnë 15 në total si pjesë e një testi klinik.
Grace ka lindur me një sindromë të rrallë, Mayer-Rokitansky-Küster-Hauser që shkakton mungesë të mitrës ose zhvillimit të saj, por vezoret funksionojnë. Në vitin 2018, Grace shpresonte se mund t’ia dhuronte nëna e saj, por ajo nuk përputhej.
Motra e saj, Amy doli vullnetare pasi kishte dy fëmijë dhe nuk donte të bënte më të tjerë. Përpara ndërhyrjes, motrat bënë seanca këshillimi. Grace dhe Angus morën mjekime fertiliteti dhe kanë ruajtur disa embrione. Grace thotë se iu ofrua mundësia për një nënë zëvendësuese apo birësim, por për të ishte “e rëndësishme” që të mbante beben në barkun e saj.
