Bashkia e Kukësit është në përfundim të programit të aktiviteteve që do të mbahen në përvjetorin e 26-të të eksodit 1999.
Kryetari i bashkisë, Albert Halilaj, tha se është bashkëpunuar me shoqatën “Eksod 99”, duke planifikuar në detaj aktivitete që do të mbahen në datën 16 prill në Kukës.
“Së bashku me drejtuesit e shoqatës ‘Eksod 99’ kemi marrë të gjitha masat e nevojshme për të bërë një sërë aktivitetesh kulturore, siç është pritja e atyre në Morin dhe ekspozitat te Pallati i Kulturës, një koncert festiv me këngëtarë të Shqipërisë dhe Kosovës, si dhe për të bërë një ceremoni, që e vlerëson në maksimum këtë ditë të shënuar, e cila shpalosi vlerat e kuksianëve në lidhje me bujarinë, mikpritjen,” tregoi z. Halilaj.
Paralelisht kryetari i bashkisë tha se do të ndërhyhet për riparimin e obeliskut që përkujton këtë ngjarje historike dhe kompletimin e tij me objektet dhe aksesoret e nevojshëm historik.
“Është një objekt tejet i amortizuar për shkak të lagështirës, për shkak të dëmtimit të fotove e materialeve brenda muzeut. Jam në kontakt me shumë donatorë për ta bërë të mundur një muze siç e meriton me gjithë aksesorët e nevojshëm, me rrethim, me ndriçim dhe me një ndryshim total të këtij obelisku,” tha kryebashkiaku i Kukësit.
Aktiviteti përkujtimor me moton “Faleminderit Kukës” u mbajt për herë të parë në 16 prill 2000 e që nga ajo kohë, manifestimi organizohet çdo 16 prill.
Në ditën e manifestimit, grupe qytetarësh të organizuar, por edhe në mënyrë spontane udhëtojnë nga Mitrovica drejt Kukësit, duke risjellë në kujtesë eksodin e më shumë se gjysmë milion shqiptarëve të shpërngulur me dhunë nga trojet e tyre për t’u vendosur në Kukës e qytete të tjera të Shqipërisë.
