Vera jashtëzakonisht e suksesshme e Tom Holland e ka ngjitur aktorin britanik në krye të listës së aktorëve me filmat me fitimet më të larta në historinë e kinemasë.
Të ardhurat e filmave të tij kanë arritur në 15.5 miliardë dollarë në mbarë botën, duke kaluar Zoe Saldana dhe Scarlett Johansson.
Aktori 30-vjeçar e arriti këtë rekord falë suksesit të dy filmave të mëdhenj ku interpreton, “Spider-Man: Brand New Day” dhe “Avengers: Endgame” të Christopher Nolan. Sipas të dhënave të cituara nga Comicbook.com, filmat ku ka marrë pjesë Holland kanë gjeneruar gjithsej 15.5 miliardë dollarë në arkë.
Me këtë shifër, Holland ka kaluar Zoe Saldana, e cila renditet e dyta me 15.46 miliardë dollarë, dhe Scarlett Johansson, me 15.40 miliardë dollarë.
Suksesi i “Spider-Man: Brand New Day” ka qenë veçanërisht i rëndësishëm. Filmi ka arkëtuar rreth 2.45 miliardë dollarë në mbarë botën, ndërsa “Avengers: Endgame” ka gjeneruar 1.68 miliardë dollarë, sipas shifrave të përmendura në raport.
“Spider-Man, Brand New Day” është ngjitur gjithashtu në mesin e filmave me fitimet më të larta në historinë e kinemasë. “Avatar” i vitit 2009 kryeson listën me 2.92 miliardë dollarë, ndërsa “Avengers, Endgame” renditet me 2.79 miliardë dollarë.
Filmi ka regjistruar rezultate të jashtëzakonshme edhe në tregun amerikan, me më shumë se 935 milionë dollarë të ardhura nga biletat vendase. Kjo e vendos atë vetëm pas “Star Wars, Episode VII – The Force Awakens”, i cili në vitin 2015 arkëtoi 936 milionë dollarë në SHBA.
Ndërkohë, “Odyssey” ka thyer gjithashtu rekorde gjatë sezonit të verës, duke u bërë, përveç “Avatar”, i vetmi film jo-vazhdim ose ribërje që ka kaluar shifrën e 1 miliard dollarëve nga të ardhurat jashtë SHBA-së dhe Kanadasë.
Suksesi komercial i “Spider-Man: Brand New Day” pritet të ndikojë ndjeshëm edhe në fitimet personale të Holland. Aktori është paguar 20 milionë dollarë për rikthimin në rolin e Peter Parker, ndërsa bonusi i lidhur me performancën në arkë pritet ta çojë ndjeshëm më lart shumën që ai do të përfitojë.
Holland e nisi rrugëtimin e tij si Spider-Man në vitin 2016, me “Captain America: Civil War”, për të cilin u pagua rreth 250 mijë dollarë. Një vit më vonë, për “Spider-Man: Homecoming”, ai mori rreth 500 mijë dollarë.
Pagesat e tij u rritën ndjeshëm me kalimin e viteve. Për “Spider-Man: Far From Home”, në vitin 2019, ai mori rreth 4 milionë dollarë, ndërsa për “Spider-Man: No Way Home”, në vitin 2021, pagesa e tij arriti në 10 milionë dollarë.
Rritja e shpejtë e Holland në Hollywood ka bërë që një person i industrisë ta krahasojë atë me Robert Downey Jr., duke e cilësuar si një version të ri të aktorit që u shndërrua në një prej yjeve më të paguar të Marvel.
Downey Jr. kishte marrë rreth 500 mijë dollarë për filmin e parë “Iron Man” në vitin 2008, ndërsa disa vite më vonë pagesat e tij u rritën në dhjetëra milionë dollarë, duke arritur në më shumë se 100 milionë dollarë të kombinuara për rolet në “Avengers: Infinity War” dhe “Avengers: Endgame”.
Me suksesin e fundit në kinema, Tom Holland tashmë kryeson listën e aktorëve, filmat e të cilëve kanë gjeneruar më shumë të ardhura në historinë e biletarisë botërore.
