Kryedemokrati Sali Berisha drejtimin politik të fushatës për zgjedhjet parlamentare të vitit 2025 ua ka besuar figurave të sprovuara në Partinë Demokratike, kryesisht të vjetërve apo dhe të rinjve, që në shumicë dërrmuese, në zgjedhjet e tyre të fundit kanë pësuar humbje.
Lidhur me këtë, ka folur Ibsen Elezi, i cili u shpreh se në Partinë Demokratike nuk ka sistem rotacioni, prandaj duhet një sistem karriere, që është një bashkësi rregullash që të tregon se ku do fillosh dhe ku do shkosh.
Sipas Elezit, kush rri më afër kryetarit dhe kush i serviloset më shumë, ka premisa më të mëdha të jetë në listat e ardhshme të sigurta për deputet.
“Se njëri shkon në një qark dhe tjetri në një qark, kjo nuk përbën ndonjë risi të madhe, se këto janë dhe këto do të shpërndahen. Pjesa e parë është kjo, fakti që Sali Berisha pas 11 dhjetorit nuk realizoi atë që iu premtoi demokratëve, që ishte një ribërje e PD dhe do të thotë një bashkësi rregullash që ringrenë një forcë politike. Jo vetëm kaq, por Berisha arriti të çedojë me keq se Basha, pasi në një parti ku vota del e tepërt, ai sistem nuk është demokratik. Këto figura politike që janë aty, janë figura që vijnë nga prapavija e Lulzim Bashës. Domethënë i një 8-vjeçari që ishin prapa Lulzim Bashës dhe pjesë e gjithë dështimit. Në momentin që gjithë modelin Basha e etiketon si dështim, kuptohet se ato gjithësecili marrin barrën e vetë. Ç’ka do të thotë, nuk ka sistem rotacioni në PD, pra në momentin që unë jam në një pikë që nuk prodhojë më politikë, jam i detyruar t’i lëshojë vendin dikujt tjetër. Ky realizohet nëpërmjet një sistemi karriere, i cili është një bashkësi rregullash që të tregon se ku do fillosh dhe ku do shkosh.
E gjithë kjo ka prodhuar një sistem se kush rri më afër kryetarit dhe kush i serviloset më shumë kryetarit, ai ka premisat më të mëdhaja që të jetë nesër në pozicionin e drejtuesit, të jetë në listat e ardhshme të sigurta për deputet. Edhe ky sistem është i dështuar nuk prodhon gjë”, tha ai.
