Baleti Kombëtar i Kosovës çdo të enjte mbush me publik sallën e Teatrit Kombëtar të Kosovës. Shpesh duhet të shtohen edhe karrige të tjera pos 296 sosh që i ka institucioni më i lartë teatror në vend. Kudo që jep koncerte Filarmonia e Kosovës, salla është plot.
Njëjtë ngjau edhe në koncertin e fundit të Korit kur në katedralen “Nëna Terezë” nuk mbeti e zbrazët asnjëra nga 600 karriget. Ministria e Kulturës, Rinisë dhe Sportit qysh prej janarit të këtij viti ka planifikuar që sivjet të paktën të hapë konkursin për projektin e teatrit të operës dhe baletit “Ibrahim Rugova”.
Por një gjë e tillë nuk është bërë ende dhe zyrtarët e këtij institucioni nuk japin afat. Kabineti i ministrit të Kulturës, Kujtim Shala, ka zhvilluar disa takime me kryetarin e Komunës së Prishtinës, Shpend Ahmeti, sa i përket kësaj çështjeje.
