Ndryshimet klimatike, Obama nga Alaska: Nëse nuk merren masa, do të zhduken shtete
Presidenti amerikan Barack Obama ka bërë thirrje që të merren masa urgjente për të ulur ngrohjen globale. Nga Alaska, Presidenti Obama kërkoi veprime urgjente për atë ë ai e quajti sfidën e shekullit, dhe do të mbledhë gjithë botën për ti bërë ballë.
Presidenti amerikan ka theksuar se ndryshimet klimatike po ecin më shpejt se përpjekjet për të ulur ngrohjen globale. “Në Arktik temperaturat ndryshojnë dyfish se sa në zonat e tjera të botës”, tha Obama nga Alaksa. “ Unë vij këtu sot, si lideri i ekonomisë më të madhe në botë, për të thënë se Shtetet e Bashkuara e njohin rolin e tyre në krijimin e problemit, dhe ne do të mbështetemi tek përgjegjësitë tona për ta zgjidhur atë”, u shpreh President i Shteteve të Bashkuara, Barack Obama
Obama paralajmëroi se efektet e ngrohjes globale, që kanë goditur Arktikun do të përfshijnë së shpejti gjithë botën, duke përmbytur shtete, asgjësuar qytete e duke lënë fushat shterpë, nëse nuk ndërmerren masa për të reduktuar emetimin e gazrave serë. Ai përsëriti 4 herë gjatë takimit të tij 24minutësh, pohimin që “nuk po veprojmë mjaftueshëm shpejt”.
Obama foli për shkrirjen e akullnajave dhe detet në rritje, në mënyrë që të arrijë një marrëveshje ndërkombëtare për të reduktuar emetimet e karbonit, që do të çojë në një samit të Kombeve të Bashkuara në Paris gjatë Dhjetorit. Obama ka premtuar se Shtetet e Bashkuara do të ulin emetimet me 26% deri në vitin 2025.
“Këtë vit në Paris (ku do të mbahet samiti për klimën) duhet të jetë viti ku bota më në fund të arrijë një marrëveshje për të shpëtuar planetin tonë…sepse ende mund të bëjmë”, deklaroi Obama.
Presidenti amerikan kërkon që lufta e tij kundrejt ndryshimit klimatik të jetë epiqendra e trashëgimisë së tij, dhe ai e planifikoi si historik udhëtimin e kësaj jave në Alaskë ku ai do të marrë pjesë edhe në një reality shoë.
