Bashkimi Evropian, Shtetet e Bashkuara dhe Mbretëria e Bashkuar kanë drejtuar gishtin kah institucionet e Kosovës për një numër dështimesh, për të cilat një ditë më parë presidenti i shtetit, Hashim Thaçi, e fajësoi komunitetin ndërkombëtar. Ndërkombëtarët e kanë mohuar edhe çfarëdo “pazari” për Gjykatën Speciale, shkruan Koha Ditore.
Një ditë më parë, në një tryezë të organizuar nga shoqëria civile me temën “Perceptimi publik i Gjykatës Speciale të Kosovës: rreziqet dhe mundësitë”, kreu i shtetit ka thënë se kishte vendosur të udhëhiqte një proces të padrejtë ndaj Kosovës dhe se ishte mashtruar nga ndërkombëtarët që, sipas tij, kishin dhënë premtime në këmbim të Speciales.
Midis premtimeve, kishte listuar: mundësinë e aplikimit për anëtarësim të shpejtë në Këshillin e Evropës, liberalizimin e vizave, mbështetjen masive për anëtarësim në UNESCO, themelimin e Forcave të Armatosura dhe njohjet e reja. Asnjëra prej këtyre nuk është përmbushur deri tash, ani se Specialja është themeluar prej më shumë se dy vitesh. (b.an)
