Anëtarë, simpatizantë dhe mbështetës të Partisë Demokratike nga Lezha, Fieri dhe Shkodra janë nisur të shtunën drejt Tiranës për të marrë pjesë në protestën e organizuar nga PD që do të mbahet në orën 12:00, në mbështetje të kërkesave të studentëve dhe të rinjve drejtuar qeverisë.
Sipas korrespondentëve të RTSH-së në terren, thirrjes së Partisë Demokratike i janë përgjigjur strukturat e degëve lokale, të cilat kanë organizuar nisjen e pjesëmarrësve me automjete private.
Në Lezhë, anëtarë dhe mbështetës të degës së PD-së janë nisur në mënyrë të organizuar drejt kryeqytetit. Strukturat lokale i bashkohen kështu tubimit në mbështetje të studentëve, të cilët vijojnë protestat me kërkesat e tyre.
Nga Fieri, siç raporton korrespondentja e RTSH-së, Laureta Roshi qytetarë dhe anëtarë të Partisë Demokratike janë organizuar një ditë më parë për t’u nisur që në mëngjesin e së shtunës. Kreu i komanduar i PD-së në Fier, Ardian Ferro, ka bërë me dije se të gjitha grupseksionet dhe strukturat e partisë kanë dalë në terren, duke kontaktuar qytetarët që shprehin pakënaqësi ndaj qeverisë aktuale.
Sipas tij, demokratët janë nisur drejt Tiranës me automjetet e tyre personale, në mënyrë të organizuar. Ferro pretendon se organizimi është bërë individualisht për të shmangur pengesat që, sipas tij, mund t’u krijohen qytetarëve dhe anëtarëve të PD-së për të marrë pjesë në protestë. Ai ka deklaruar se demokratët dhe qytetarët janë të mobilizuar e të vendosur për t’i dhënë fund “këtij regjimi”.
Nga zonat e Mallakastrës, Patosit dhe Roskovecit, qytetarë e demokratë janë nisur që në orët e para të mëngjesit të së shtunës për t’u bashkuar protestës së organizuar nga Partia Demokratike.
Nga Shkodra, simpatizantë dhe mbështetës të Partisë Demokratike janë nisur këtë mëngjes drejt Tiranës. Demokratët shkodranë i bashkohen tubimit në mbështetje të studentëve dhe të rinjve, të cilët prej ditësh po protestojnë për kërkesat e tyre.
Protesta e PD-së zhvillohet në kuadër të thirrjes për mbështetje ndaj studentëve, të cilët vazhdojnë demonstratat me kërkesat e tyre ndaj ekzekutivit.
