Këshilli i Atlantikut të Veriut është mbledhur sot në formatin e KFOR-it, së bashku me partnerët që kontribuojnë me trupa, për të diskutuar situatën e sigurisë në Kosovë me komandantin e misionit, gjeneralmajorin Özkan Ulutaş.
Gjatë informimit të tij të fundit për Këshillin, ku mori pjesë virtualisht, Ulutaş dha një përditësim mbi përpjekjet e KFOR-it për ruajtjen e një mjedisi të sigurt për të gjithë qytetarët në Kosovë dhe garantimin e lirisë së lëvizjes.
KFOR-i vijon të veprojë në përputhje me Rezolutën 1244 të Këshillit të Sigurimit të OKB-së, në koordinim të ngushtë me Policinë e Kosovës dhe misionin e BE-së për Sundimin e Ligjit, EULEX, në përputhje me rolet e tyre përkatëse në fushën e sigurisë.
Komandanti i KFOR-it foli gjithashtu për procesin e optimizimit të pranisë së misionit, i cili, sipas NATO-s, lidhet me përmirësimin e vazhdueshëm të situatës së sigurisë në Kosovë.
Procesi do të zbatohet gradualisht dhe do të jetë plotësisht i kthyeshëm në rast se zhvillimet e sigurisë e bëjnë të nevojshme. NATO thekson se KFOR-i do të vijojë të jetë i pajisur, i trajnuar dhe i organizuar në mënyrë të përshtatshme për përmbushjen e mandatit të tij, duke ruajtur gatishmërinë dhe fleksibilitetin për t’iu përgjigjur skenarëve të ndryshëm të sigurisë.
Në deklaratë, NATO e cilëson Ballkanin Perëndimor si një rajon me rëndësi strategjike për Aleancën dhe thekson se angazhimi për sigurinë e qëndrueshme në Kosovë dhe stabilitetin rajonal mbetet i palëkundur.
Aleanca ka përsëritur gjithashtu mbështetjen për dialogun e lehtësuar nga Bashkimi Evropian mes Beogradit dhe Prishtinës, duke e konsideruar atë si kornizën për zgjidhjen e çështjeve të pazgjidhura dhe garantimin e respektimit të të drejtave të të gjitha komuniteteve.
Gjeneralmajor Özkan Ulutaş pritet të përfundojë mandatin e tij të dytë në krye të KFOR-it në mesin e tetorit. Ai do të pasohet nga gjeneralmajori italian Roberto Vergori.
