Alvi Manaj, motra e sulmuesit të Interit, Rey, ka rrëfyer në një intervistë me “Panorama Sport” marrëdhëniet me vëllain, suksesin e të cilit po e shijon së tepërmi. Katër vjet më e madhe se 18-vjeçari kuqezi, të cilit i ka vënë emrin, ajo është kritike e fortë e djaloshit të ri, për ta nxitur të përmirësohet vazhdimisht. Alvi është tifoze e Zlatan Ibrahimoviç dhe tipare të suedezi sheh edhe te vëllai i saj, nga loja dhe karakteri, ndonëse thotë me të qeshur se “Rey nuk është aq zevzek sa Ibra”.
Manaj tani luan tek Interi, një skuadër që do ta ëndërronte çdo 18-vjeçar, por Alvi thotë se nuk i është rritur mendja, përkundrazi: “Mendoj që ai është vërtet shumë i lumtur, edhe pse nuk e shpreh. Nuk është bërë aspak mendjemadh, madje tani ka akoma më shumë dëshirë dhe vullnet për të punuar më fort për të realizuar qëllimet e tij. Është i kënaqur, por sigurisht po punon më shumë për të siguruar më shumë minuta në fushën e lojës, për të treguar se sa vlen, pasi ai akoma nuk ka treguar asgjë”.
Ajo zbulon edhe se të gjithë familjarisht kanë qenë tifozë të Interit që para se Rey të shkonte atje, por sqaron se nuk ishte tifozllëku shkaku që Manaj vendosi të shkonte në klubin zikaltër.
Në miqësoret e nëntorit, Manaj do të vishet kuqezi, i thirrur nga De Biasi, me të cilin lojtari pati një incident që u mbyll shpejt. “Mendoj që e gjithë situata që u krijua ishte keqkuptim. Të dyja palët u keqkuptuan për një koment të trajnerit në një emision, e më pas keqinterpretimi që shokët ia përcollën atij, i cili u tregua impulsiv dhe reagoi në atë mënyrë që nuk duhej, pasi ishte në dëm të tij. Por, e gjitha tashmë ka mbetur pas dhe Rei ka një marrëdhënie shumë të mirë me De Biazin. E kemi vlerësuar shumë mirëkuptimin e tij, një trajner dhe njeri më shumë se profesionist. Im vëlla është shumë i lumtur për mbështetjen e tij, e ka kuptuar gabimin dhe shpresoj që të mos përsëriten më në të ardhmen, sepse ai mbetet i dëmtuar. Nuk dua të flas si motra e tij për këtë, mirëpo, në rast se i jepet mundësia, le ta tregojë veten në fushë, të shohin sa vlen. Në këtë mënyrë do të fitojë edhe më shumë respektin e De Biazit dhe të tifozëve. Mundësitë pa meritë mua nuk më pëlqejnë…”.
