Ministri i Pushtetit Vendor Ervin Demo, në fjalën e tij gjatë takimit me përfaqësues të agro-turizmit tha se Paketa e Maleve nuk sjell asnjë konflikt në komunitet.
Demo nënvizoi se vetëm në Bashkinë e Tiranës deri tani ka pasur 600 shprehje interesi për investime, sipas Paketës së Maleve. Ministri nënvizoi se ky program ka ndihmuar në rijetësimin e zonave rurale.
Ministri për Pushtetin Vendor Ervin Demo: Paketa e Maleve është shumë e rëndësishme për zhvillimin e territorit. Kemi 36 bashki, që kanë miratuar zonat prioritare. Hartat do bëhen publike dhe këto harta do jenë dhe në E-Albania. Shpallja publike është e rëndësishme, për të garantuar që mos sjellë konflikte në komunitet. Në Tiranë janë mbi 600 aplikime, që kanë shprehur interes për Paketën e Maleve.
Kush ka trashëguar tokë nga të parët, mund të investojë dhe Bashkia do e ndjekë këtë prioritet. Bashkia e Tiranës do ta ketë parasysh shprehjen e interesit nga ana e qytetarëve. Paketa e Maleve është për sipërmarrësit e vegjël dhe të mesëm, që në disa zona kanë shënuar histori suksesi. Njerëzit që jetojnë në zona rurale e kanë një arsye përse duhet të qëndrojnë në këto zona.
