Deputetja Erisa Xhixho ka akuzuar qeverinë shqiptare për shkelje të rëndë të lirisë së shprehjes, duke e krahasuar situatën në Shqipëri me Rusinë e Vladimir Putinit. Në një postim në rrjetet sociale ajo ka përmendur rastin e Alexei Navalny, që sipas saj, edhe pse në një regjim autoritar si ai rus, Navalny arriti të komunikonte nga burgu dhe të përcillte denoncimet e tij te miliona qytetarë, ndërsa në Shqipëri ndodh e kundërta me ish-presidentin Ilir Meta.
“Në Rusi, Putin nuk ia hoqi Navalnyt lirinë e shprehjes. Denoncimet e tij për kushtet nga burgu në Arktik dhe kritikat ndaj regjimit autoritar të Putinit arritën pa pengesë te miliona rusë. Në Shqipëri ndodh e kundërta me ish-presidentin e vendit, z.Ilir Meta. I izoluar në ekstrem, atij i është mohuar tërësisht e drejta për të komunikuar me mediat. Çdo përpjekje për të komunikuar me gazetarët është ndëshkuar, çdo fjalë e tij është censuruar me urdhër të Edi Ramës”, shkruan Xhixho
Sipas saj Meta ndodhet në izolim ekstrem dhe i është mohuar plotësisht e drejta për të komunikuar me mediat
“Sepse ndryshe nga regjimi i Putinit, ai i Edi Ramës të heq të drejtën e fjalës, në emër të një pushteti që nuk pranon kritika”.
Deputetja e PL-së vë në pikëpyetje aspiratën europiane të vendit, për shkak të shkeljes së parieve bazë të demokracisë dhe të drejtave të njeriut.
“A mund të flasim për Shqipëri Europiane, kur Tirana sillet më keq se Kremlini? As në 2030, as kurrë! Raporti i Avokatit të Popullit e thotë qartë se komunikimi me mediat është në bazë të parimit për të drejtën e shprehjes dhe transparencën. Respektimi i Konventës Europiane për të Drejtat e Njeriut nuk është opsion, është detyrim ligjor. Zbatimi i 9 rekomandimeve të Avokatit të Popullit është gjithashtu detyrim. Shqipëria europiane që qytetarët meritojnë duhet të ketë në themel demokracinë dhe shtetin e së drejtës”, shkruan Xhixho në rrjetet sociale.
