Thirrja e presidenti Ilir Meta që qytetarët t’i bashkohen atij në 2 mars në protestë në bulevardin “Dëshmorët e Kombit” kundër qeverisë, duket se është një tentativë për të “eliminuar” Lulzim Bashën nga kreu i opozitës.
Të paktën kështu mendojnë, ish-kreu i Shërbimit Informativ Shtetëror, Fatos Klosi dhe zv/ministri i Mbrojtjes, Petro Koçi. Gjatë një prononcimi të shkurtër për gazetën “Sot”, ish-kreu i SHISH shprehu dje bindjen se lëvizja e presidentit Meta për të dalë në tubime është strategjike dhe bëhet në kushtet e emergjencës, pasi sipas tij, kryedemokrati Basha ka kohë që ka dalë nga korniza e udhëheqësit të opozitës.
Kështu që, duke parë situatën, Klosi theksoi se kreu i shtetit ka thirrur qytetarët në protestë për të dubluar e eklipsuar Bashën dhe për t’i marrë atij drejtimin e liderit të opozitës.
“Kam dëgjuar që Meta ka thirrur tubim në 2 mars dhe i ka kërkuar ndihmë opozitës që të mbushin sheshin. Kështu që, në kushtet kur Lulzim Basha nuk ka qenë asnjëherë dhe nuk është udhëheqës i opozitës presidenti Ilir Meta e ka kuptuar që ai nuk e bën dot këtë punë dhe është hedhur në aksion. Pra, Meta ka vendosur që të dalë në shesh për të marrë ai drejtimin e opozitës”, deklaroi Klosi.
Koçi: Meta synon të marrë frenat e opozitës
Por marrjen e frenave të opozitës nga presidenti Ilir Meta e ka paralajmëruar dje edhe zv/ministri i Mbrojtjes, Petro Koçi. Ky i fundit
deklaroi dje se Meta ka thirrur protestë në dy mars, pasi sipas tij, po tenton të bëhet lider i opozitës. Në këtë kontekst, zoti Koçi theksoi se kreu i shtetit është në dijeni se i ka ditët e numëruara në Presidencë pasi do të shkarkohet nga mazhoranca, kështu që sipas tij, ka parë të udhës daljen në rrugë për t’u sprovuar sepse të ardhmen e sheh në politikë dhe vetëm si kreu i opozitës.
“Ilir Meta po bën provë gjenerale se çfarë do të bëjë, pasi të ikë nga Presidenca. Përmes protestës së 2 marsit presidenti Meta po tenton të marrë lidershipin shpirtëror dhe organizativ të opozitës, duke nxjerrë jashtë loje Lulzim Bashën”, deklaroi ai.
Po ashtu, zoti Koçi theksoi se një tjetër arsye se përse presidenti Meta ka ashpërsuar reagimin dhe është hedhur në aksion kundër mazhorancës qeverisëse është mbrojtja e LSI, pasi sipas tij, kjo forcë politike po shkon drejt kapitullimit. “Banda e rilindjes se 14 shtatorit do protestoje me bisht nder shale ne 2 Mars! Lëvizja e Metës është një përpjekje për të rilindur peshën e humbur të LSI brenda opozitës”, nënvizoi Koçi.
/a.r
