Drejtori i Kadastrës, Artan Lame, i cili njihet edhe si studiues e koleksionist, ka bërë thirrje për hetime në lidhje me sasinë e floririt që Mbreti Zog mori me vete kur u largua nga Shqipëria në vitin 1939.
Në emisionin “Now” në Euronews Albania”, Lame u shpreh se Princ Leka, si trashëgimtar i fronit, duhet t’i japë llogari shtetit shqiptar për këtë çështje.
“E para, dokumenti ka nevojë për hetim të mëtejshëm. E dyta, unë nuk e besoj farë këtë zotërinë Gjonin. E treta, shteti shqiptar përsa kohë edhe e pranoi të kthehej në Shqipëri Princ Lekën dhe familjen mbretërore, unë jam nga ata që them po, duhej pranuar që të ktheheshin në Shqipëri, duke dhënë disa llogari.
Si trashëgimtar i fronit është dikush dhe ka llogari për të dhënë para shtetit shqiptar dhe shteti shqiptar ka detyrime ndaj tij për atë që përfaqëson”, theksoi ai.
Drejtori i Arkivës: Ahmet Zogu mori 40 milionë dollarë me vete
Drejtori i Arkivës, Ardit Bido tha në “Now me Erla Mëhillin” se Ahmet Zogu mori me vete 40 milionë dollarë.
“Duhet të theksojmë se nuk bëhet fjalë për ndonjë shifër marramendëse. Kjo 250 mijë napoleonë floriri ishte në vlerën e kohës 1.5 milionë dollarë, me inflacion sot do të ishte diku te 40 milionë dollarë. Pra, nuk bëhet fjalë për një shifër e cila është marramendëse kur vjen fjala për kapacitetet e një vendi,” – u shpreh Bido.
Ai sidoqoftë theksoi se 1.5 milionë dollarë aso kohë nuk mund të krahasohen me 40 milionë dollarë sot.
“Xhepat po i shpërthenin nga paratë”, fotografia e rrallë e Ahmet Zogut në Angli
Historiani Erald Kapri ka treguar në emisionin “Now” në Euronews Albania, një fotografi të rrallë të Mbretit Zog në Angli.
Kapri u shpreh se Zogu kishte marrë 50 mijë stërlina nga banka dhe i kishte vendosur në xhepin e mbrampë të xhaketës.
Kjo i kishte rëndë në sy edhe shtypit britanik të asaj kohe dhe fotoja ishte publikuar me titullin “King Zog Bulges”, ose gunga e Mbretit Zog, pasi xhepat po i shpërthenin nga paratë.
“Është një foto e publikuar në shtypin britanik dhe titullohet “King Zog Bulges”, ose gunga e Mbretit Zog. Po të shikoni mbrapa në xhaketë, ka futur 50 mijë stërlina. Sa nisi Lufta e Dytë Mbretërore, udhëtoi me urgjencë nga Franca në Londër, qëndroi 6 ditë në Londër, vajti në bankë dhe i mori dhe i futi mbrapa.
Po ta shikosh, xhepi i xhaketës po i shpërthen nga mbrapa. 50 mijë stërlina i mori dhe i futi mbrapa sepse nuk kishte besim as te nipërit që e shoqëronin”, theksoi ai./m.j
