Mbledhja e Këshillit Bashkiak ku u miratua buxheti i Bashkisë Tiranë për 2024 ka nisur me një incident.
Sekretari i Përgjithshëm i Partisë së Lirisë, Tedi Blushi ka ndërprerë mbledhjen teksa Kryetari i Bashkisë së Tiranës, Erion Veliaj ka marrë fjalën duke folur për buxhetin për të cilin tha se është 10 herë më i madh se ai që u gjet nga administrata e kaluar.
Blushi ka vënë një palë pranga mbi mikrofonin e kryetarit të Bashkisë, ndërsa Kryetarja e Këshillit Bashkiak Romina Kuko kërkoi ndërhyrjen e policisë bashkiake për ta nxjerrë jashtë. Kryebashkiaku Veliaj tha se në fakt prangat po i afrohen dikujt nga zyra e Partisë së Lirisë.
“Kam përshtypjen se prangat po i afrohen dikujt te ajo zyra (te zyra e PL-së) prandaj. I keni speciale për Ilirin, i keni me gëzof”, tha Veliaj.
Më pas Buxheti i Bashkisë Tiranë për 2024 është miratuar pa diskutime./m.j
