Mendimi se trupa gjyqësore duhet të presë publikun apo qytetarin, duket se irritoi së tepërmi gjykatësin e apelit Dhimitër Lara, i cili fillimisht në shenjë mohuese (duke lëvizur gishtin tregues) pyeti Ministrin e Drejtësisë Ylli Manjani se për çfarë duhet të presë gjyqtari publikun.
Gjatë fjalës së Ministrit Manjani në Konferencën Kombëtare Gjyqësore, ka patur edhe një debat të shkurtër mes tij e gjykatësit Lara, pasi ky i fundit nuk ka pranuar idenë e Ministrit për të pritur qytetarët nëpër gjykata.
Në kundërpërgjigje Ministri shpjegoi se po kërkohet një kocept i ri, i një gjyqtari të besueshëm në komunitet që së pari i shërben këtij të fundit.
Debati
Manjani: Kam qenë përkrahës dhe mbetem përkrahës i gjykatës komunitare. Kryetarët e gjykatave në mënyrë të veçantë duhet të jenë njerëz publik, duhet të jenë njerëz publik jo vetëm që thjesht të presin dhe përcjellin njerëz hallexhinj në zyrat e gjykatave
Lara: Për çfarë t’i presim?
Manjani: Por kryetari i gjykatës duhet të jetë….ja do ta shpjegoj mos u mërzit
Lara: Për çfarë do t’i presim
Manjani: Mos u mërzit
Lara: Ti presim në ç’gjykatë…
Manjani: Mos u mërzit, po kërkojmë një koncept tjetër dhe ky koncepti tjetër do të thotë që kryetari i gjykatës është njeri publik në komunitet dhe i shpjegon ligjin komunitetit. Kështu që ky është një koncept shumë i ri e kuptoj reagimin mos u mërzit se do të kemi kohë ta qetësojmë dhe njëri-tjetrin dhe ta sqarojmë njëri-tjetrin ashtu siç duhet.
Dhe gjyqësor i besueshëm do të thotë t’i shërbesh komunitetit sipas nevojës dhe jo të presësh komunitetin dhe gjysmën ta kënaqësh se i jep të drejtën dhe gjysmën e pakënaqur ta bësh edhe më të pakënaqur. Ky është problemi i juaj dhe jo i joni….
Ne e kemi shumë kollaj t’ju themi që jeni të korruptuar kjo është gjëja më e thjeshtë; Ju fusim gjithëve në një thes dhe gjejeni ju pastaj çelësin se si do hapet ky thesi për të dalë nga korrupsioni, kjo është më e thjeshta. Po përpiqemi të jemi në një varg që të mund të dalim bashkarish aty ku duhet dhe shërbim i besueshëm do të thotë që të shërbesh shpejt.
