Kryeministri i vendit, Edi Rama të hënën u rikthye sërish në Vlorë ku inspektoi nga afër aksionet për lirimin e hapësirave publike, aksion ky, i cili siç është paralajmëruar prej tij do vijojë deri në fund.
Gazetari Fatos Mahmutaj, i ftuar në “Ora e Fundit” në ABC News tha se aksioni duhej të kishte nisur disa muaj më parë, por megjithatë lirimi i hapësirave publike është një akt, i cili vlerësohet nga qytetarët.
“Kryeministri Rama është i vonuar me aksionin që po bën për lirimin e plazheve dhe hapësirave publike për pushuesit në sezonit e verës. Sot është data 8 korrik, dhe kjo gjë duhej të bëhej të paktën në fillim të marsit, sepse me klimën shqiptare, sezoni turistik fillon në fillim të prillit, por gjithsesi kjo është gjë e mirë”, theksoi ai.
Ai komentoi dhe përplasjen e fundit të kryeministrit Edi Rama me Prokurorinë e Shkodrës, për vendosjen e disa kabinave në zonën turistike të Thethit.
Kryeministri Rama hodhi akuza ndaj prokurores Elsa Gjeli, e cila sipas tij, nuk ka nisur procedim penal për shkatërrimin e mjedisit, që i është bërë pikës turistike në Theth.
Sipas gazetarit, denoncimi i kryeministrit Rama është veprim i duhur, por nuk duhet të lihet me kaq.
Ai shtoi se për goditjen e këtij fenomeni duhet të vihen në lëvizje institucionet shtetërore dhe nuk duhet mjaftuar thjesht me denoncime apo qëndrime në rrjete sociale.
Gazetari Mahmutaj theksoi se prokurorja Elsa Gjeli, e cila u denoncua nga Rama ka shkelur ligjin me të dyja këmbët
“Për prokuroren e Shkodrës denoncimi i kryeministrit Rama është denoncim i duhur. Kryeministri Rama duhet të lëvizë të gjithë mekanizmat shtetërore për t’ju dhënë fund këtyre lloj gjyqësive, që individë të veçantë bëjnë në kryesisht në rrethe larg Tiranës. Në rastin konkret jemi në Malësinë e Madhe, ku një prokurore e shkel ligjin me të dyja këmbët dhe nuk e vret mendjen fare për këtë gjë, Kryeministri duhet të vendosë në lëvizje institucionet dhe jo vetëm me fjalë nëpër media, dhe në rrjetet sociale”, tha ai.
