Lidhja Demokratike e Kosovës (LDK) ka zyrtarizuar mbështetjen për kandidatin e propozuar për president, Bekim Sejdiu, pas një mbledhjeje të Kryesisë së partisë. Vendimi vjen në kuadër të diskutimeve rreth marrëveshjes së arritur me Lëvizjen Vetëvendosje për postin e kreut të shtetit.
Anëtari i Kryesisë së LDK-së, Berat Rukiqi, bëri të ditur pas mbledhjes se nuk ka pasur asnjë qëndrim kundër kandidaturës së Sejdiut brenda këtij organi, duke theksuar se partia duhet të ketë një qëndrim të unifikuar rreth kësaj çështjeje.
Në të njëjtën linjë është pozicionuar edhe deputetja e kësaj partie, Jehona Lushaku, e cila para takimit ka konfirmuar mbështetjen për Sejdiun. Duke iu referuar procesit negociator, ajo u shpreh se partia i kishte dhënë kompetenca të plota udhëheqjes.
“Ne kemi autorizuar kryetarin edhe ekipin për të negociuar dhe ata kanë pasur autorizime të plota për të bërë propozime dhe për t’i diskutuar emrat.“, tha ajo.
Lushaku ka sqaruar gjithashtu se struktura e LDK-së nuk ka qenë në dijeni paraprake për emrin konkret që do të propozohej si kandidat për president.
Megjithatë, pavarësisht unitetit të shfaqur në nivel Kryesie, ende mbetet e paqartë nëse ky qëndrim do të shtrihet edhe në të gjithë grupin parlamentar. Sfida kryesore për unifikimin e votës mbetet qëndrimi i shprehur një ditë më parë nga deputeti Avdullah Hoti, i cili ka deklaruar hapur se nuk do ta votojë Bekim Sejdiun.
Për të adresuar këto divergjenca dhe për të arritur një pozicion të përbashkët partiak, pasditen e sotme pritet të mbahet takimi i përbashkët i Kryesisë me grupin parlamentar të LDK-së.
