Shtypi kosovar po merret gjatë me ministrin e Drejtësisë Hajredin Kuçi. Kjo sepse ky anëtar qeverie ka shënuar në formularin e deklarimit të pasurisë, se zotëron vetëm 370 euro. Njeriu i dytë më i fuqishëm i Partisë Demokratike të Kosovës dhe njëri ndër figurat publike më të njohura në Kosovë, rezulton i varfër financiarisht. Aq sa nuk mund të blejë as edhe një orendi shtëpie, në rast se i prishet.
Por paraja nuk është gjithçka. Një njeri ka dhe prona të patundshme. E këtu Kuçi nuk ka të drejtë të “qahet”. Së pari ai është i punësuar në katër vende, si minstër dhe si pedagog në tre universitete. Ndërkaq të ardhurat e tij janë 33 mijë euro në vit, pa llogaritu rrogën e bashkëshortes dhe dy shtëpi, njërën në Prishtinë, e cila vlen 160 mijë euro dhe tjetrën më të vogël, vetëm 60 mijë euro.
