Partia Demokratike ka denoncuar abuzimin me taksën e arsimit tek shkollat e dëmtuara nga tërmeti në zonën e Kombinatit.
Përfaqësuesit e PD, Jorida Tabaku dhe Klevis Balliu vunë në fokus situatën me Shkollat “Musine Kokalari” dhe “Lasgush Poradeci”, të cilat janë dëmtuar rëndë nga tërmeti dhe rreth 2500 nxënës janë shpërndarë në shkolla të tjera.
“22 milionë euro janë mbledhur nga viti 2016 deri më sot për taksën e infrastrukturës në Arsim, 22 mln euro që duhej të ishin investuar në shkolla, në kopshte, në çerdhe, ndërkohë që Tirana, megjithëse pasojat e tërmetit nuk ishin si në zonat e prekura më rëndë, ka numër të madh të shkollave, të dëmtuara nga tërmeti“, u shpreh Jorida Tabaku.
Sipas PD, në 3 vjet, Erion Veliaj nuk ka investuar asnjë qindarkë prej tyre në të dyja shkollat, që sot janë të dëmtuara.
“Tërmeti zbuloi se nisma “Adopto një shkollë” ishte vetëm fasada e një propagande të shëmtuar dhe të rrezikshme, që, nëse tërmeti do të kishte rënë ditën, mund të kishte pasoja tragjike për fëmijët.
Pyetja themelore është: ku shkojnë paratë e qytetarëve.
Në këtë shkollë pak kohë më parë janë bërë disa punime për lyerje bojërash, të cilat i shërbejnë për propagandë dhe fotografi Bashkisë së Tiranës, por nuk është bërë asnjë punim serioz duke bërë matjet e duhura dhe të parashikuara me ligj. Dhe është kjo arsyeja themelore se përse sot shkolla është e mbyllur“, u shpreh Klevis Balliu në deklaratën e tij.
g.kosovari
