Kërcënohet me lëndë eksplozive efektivi i Policisë në burgun e Shënkollit. Persona ende të paidentifikuar vendosën një sasi tritoli në banesën e tij në Krujë. Fatmirësisht, eksplozivi është pikasur që në orët e para të mëngjesit nga banorët, të cilët pasi kanë vënë në dijeni të zotin e shtëpisë, kanë lajmëruar Policinë.
Kjo e fundit mbërriti menjëherë në vend dhe bëri të mundur sekuestrimin e lëndës plasëse përpara se ajo të shpërthente. Sipas të dhënave zyrtare, ngjarja ka ndodhur dje në fshatin Bubq, Krujë, në banesën e shtetasit me inicialet I. D., 52 vjeç, me detyrë punonjës Policie në burgun e Shënkollit.
Nga hetimet rezulton se kjo sasi është vendosur gjatë natës. Policia po punon për identifikimin dhe kapjen e autorit, ndërsa është marrë edhe dëshmia e policit. Ai mësohet të ketë mohuar të ketë pasur konflikte të hapura as për shkak të detyrës dhe as konflikte të tjera personale.
Nuk dihet nëse ngjarja ka lidhje me detyrën apo me ndonjë konflikt tjetër. Një grup i posaçëm hetimor është angazhuar për të zbardhur ngjarjen e rëndë. Nga hetimet paraprake rezulton se atentati kundrejt punonjësit të Policisë të jetë bërë për shkak të detyrës, pasi dyshohet që efektivi mund të ketë pasur konflikte për shkak të detyrës apo edhe konflikte personale.
Mbi 10 shoqërime janë kryer nga ana e Policisë, kryesisht persona, të cilët dyshohet të kenë pasur dijeni për ngjarjen apo edhe që dyshohet se mund të jenë autorë të saj. Materialet i kaluan Prokurorisë së Rrethit Gjyqësor Krujë për veprime të mëtejshme për veprat penale “Shkatërrimi i pronës me eksploziv” i mbetur në tentativë dhe “Prodhimi dhe mbajtja pa leje e armëve luftarake dhe e municionit”.
Sipas të dhënave nga grupi hetimor, nuk përjashtohet dyshimi se ngjarja mund të ketë lidhje me kohën kur 52-vjeçari ka qenë me detyrë si punonjës Policie në Fushë-Krujë dhe Krujë. Po hetohet nëse ai ka pasur në kompetencë kontrolli zona të caktuara, të cilat janë në hartën e zezë për kultivim të lëndëve narkotike, pasi nuk përjashtohet dyshimi se lënda është vendosur si shenjë hakmarrjeje ndaj tij.
Burime të Policisë bënë të ditur se kjo është hera e dytë që i vendoset në banesë lëndë eksplozive të njëjtit efektiv. Herën e parë ka shpërthyer, por fatmirësisht dëmet kanë qenë vetëm materiale.
ma.me
