Ne e kemi sëmundje kombëtare hiperbolizimin e figurave, por kjo ka të ngjarë të jetë e vërtetë. Pak kush është në dijeni për figurën e Ymer Domit, shqiptarit që u bë konstruktor eminent i anijeve kozmike në ish Bashkimin Sovjetik. Ymer Domi u lind në Gjakovë në vitin 1900. Ishte anëtar i shoqërisë “Bashkimi” të Avni Rrustemit dhe udhëheqës në qetat e Bajram Currit. Pas rrëzimit të Qeverisë së Fan S. Nolit, në dhjetor të vitit 1924, Ymeri, së bashku me Ali Kelmendin e Hamdi Zajmin, vendosen në Bashkimin Sovjetik.
Në qytetin e Leningradit, ata arrijnë të përfundojnë shkollën e oficerëve “Zherzhinski”.
Pas vitit 1930, kur mbreti i Shqipërisë, Ahmet Zogu, shpalli amnistinë për migracionin politik, Ymer Domi mbetet në Rusi, ku edhe martohet. Duke qenë nën qeverisjen diktatoriale të Stalinit, ai u detyrua ta ndërroi mbiemrin, nga Domi në Rezinov. Ai e zgjodhi këtë mbiemër për shkak të mallit që e kishte për fushat e rezinave, që ndodhen në Gjakovën e tij. Më vonë e ndërron edhe këtë mbiemër, sepse donte diçka më të ngjashme me emrin e Gjakovës. Jakovlev (që d.m.th. Gjakova), do të jetë mbiemri i tij që do ta mbante gjatë gjithë jetës deri në vitin 1996, kur edhe do t’i mbyllë sytë përgjithmonë.
Ai ka lënë pas vetes dy djem: Aleksejin (fizikan) dhe Vasilin (ekonomist). Pas rënies së diktaturës staliniste, me ç’rast Rusia nisi të frymoi lirshëm, Ymerit i lindi një vajzë, të cilën e pagëzoi me emrin Rilindja. Sipas disa pohimeve, thuhet se ai ishte konstruktor në projektet hapësinore sovjetike.
