Sipas asaj që bëjnë të ditur mediat italiane, në mes 10 të arrestuarve është dhe Gëzim Sallaku, një biznesmen shqiptar, Presidenti i një skuadre futbolli në Itali, dhe i vëllai Saimir Sallaku.
Biznesmeni u arrestua edhe në mes të prillit, pas përfundimit të hetimeve të prokurorisë së Brescias, por më pas ishte liruar. Ai akuzohet se është pjesë e një organizate kriminale e akuzuar për pastrim parash, mashtrim, përvetësim dhe mashtrim përmes falimentimeve si dhe mashtrime të tjera administrative .
Sipërmarrësi Sallaku, me origjinë shqiptare, por që prej vitesh jeton në Itali është pronar i një sërë hotelesh dhe restorantesh në Sebino. Ai është njohur dhe si president i skuadrës së futbollit ku luan vëllai i sulmuesit Mario Balotelli.
Policia italiane bën të ditur se ka sekuestruar pasuri të paluajtshme, makina si dhe para në vlerën e 8 milionë eurove.
Corriere della Serra shkruan se banda dominonte prokurimet publike të Iseos por dhe të Bergamos, e Brescias falë bashkëpunimit me administratorët lokalë profesionistë dhe funksionarë të bankës
Kështu gjatë këtij operacioni janë sekuestruar 10 sipërmarrje, 92 godina si dhe 32 autovetura, një motoskaf si dhe miliona euro. E gjithë sasia e sekuestruar kap shifrën e 8 milion eurove. Vëllezërit shqiptarë janë lënë në arrest me burg, ndërsa për 7 të tjerë detyrim me paraqitje dhe një në arrest shtëpie.
