Ndeshja mes Vllaznisë dhe Teutës e zhvilluar ditën e djeshme, e diel 12 prill nuk kaloi pa trazira.
Policia e Shkodrës procedoi në gjendje të lirë gjashtë persona pasi në përfundim të takimit dëmtuan stolat në stadiumin “Loro Boriçi” si dhe i hodhën ato në fushën e blertë.
“Specialistët për Hetimin e Krimeve të Komisariatit të Policisë Shkodër referuan materialet në Prokurori, ku nisi procedimi penal në gjendje të lirë për shtetasit E. N., 23 vjeç; G. S., 21 vjeç; S. K., 20 vjeç; F. M., 20 vjeç; B. G., 21 vjeç; L. L., 21 vjeç, banues në Durrës, për veprat penale ‘Shkatërrimi i pronës’ dhe ‘Veprime të dhunshme në aktivitetet sportive’.
Pasi më datë 12.04.2026, në përfundim të ndeshjes midis ekipeve të futbollit ‘Vllaznia – Teuta’, e zhvilluar në stadiumin ‘Loro Boriçi’, kanë dëmtuar disa stola në tribunat E4 dhe E5, dhe më pas i kanë hedhur në ambientet e brendshme të fushës”, njoftoi policia.
Ekipi Shkodran e fitoi sfidën 1-0 duke konsoliduar akoma më shumë pozitat në krye të tabelës me 59 pikë, ndërsa Teuta mbetet në vendin e gjashtë me 38 pikë.
