Lidh Shkodrën me Malin e Zi, Koçiu dhe Karakaçi inspektojnë aksin Shirokë–Zogaj: Gati në Maj!

Zëvendëskryeministrja Albana Koçiu, së bashku me ministrin e Infrastrukturës dhe Energjisë Enea Karakaçi dhe kryebashkiakun e Shkodrës Benet Beci, kanë inspektuar këtë të hënë, më 13 prill, punimet në segmentin rrugor Shirokë–Zogaj.

Ky projekt, i financuar nga BERZH dhe në fazë përfundimtare, synon të përmirësojë ndjeshëm infrastrukturën rrugore dhe të shërbejë si një lidhje e rëndësishme mes zonave turistike të Shirokës dhe Shkodrës me Malin e Zi.

Rruga e re pritet të rrisë ofertën turistike të zonës, veçanërisht në drejtim të turizmit liqenor, duke lehtësuar lëvizjen e vizitorëve dhe duke nxitur zhvillimin ekonomik lokal.

Gjatë inspektimit, zv.kryeministrja Koçiu u shpreh se ky segment do të ketë ndikim të drejtpërdrejtë në lehtësimin e qarkullimit të qytetarëve dhe transportit të mallrave, duke përmirësuar ndjeshëm lidhjet ndërkufitare dhe aksesin në zonat turistike.

“Në fakt është një punë shumë e mirë. Në këtë segment rrugor, 6.5 kilometra, nga Shiroka në fshatin Zogaj, në pikëkufitare me Malin e Zi. Është një segment rrugor i cili do të lehtësojë shumë lëvizjen dhe qarkullimin e qytetarëve, por edhe të mallrave. Megjithatë unë mendoj që vlerë e shtuar e këtij investimi është fakti që oferta turistike bëhet më atraktive dhe më e dobishme në funksion të sezonit turistik, të zhvillimit të qytetit të Shkodrës, duke vlerësuar dhe faktin që jemi duke punuar me Malin e zi, aktualisht kemi një marrëveshje në fuqi për të vendosur edhe një pikë kufitare të përbashkët të lëvizjes, pra një one stop shop, ku shërbimet kufitare merren në të njëjtën pikë”, tha Koçiu.

Pasi vlerësoi edhe për projektin “Porta e Alpeve”, Koçiu shtoi se “porta hyrëse është këtu në Shkodër” me një projekt investimi prej 100 milionë eurosh, që sipas saj do të sjellë zhvillim të turizmit jo vetëm të Shkodrës, por edhe të të gjithë vendit.

Gjatë inspektimit, u konfirmua se nga mesi i muajit maj (pra edhe në nisje të sezoni turistik) pritet që ky aks të ketë përfunduar.