Detaje të reja kanë dalë në dritë nga ngjarja e rëndë që tronditi qytetin e Fierit gjatë mesnatës, ku një 47-vjeçar humbi jetën gjatë një tentative për grabitjen e një banese.
Nikollaq Lule, vëllai i pronarit të banesës ku u tentua grabitja, ka deklaruar para mediave se autori ka thyer xhamin e derës me qëllim hyrjen brenda ambienteve të shtëpisë, por ka ngecur aty, duke humbur dhe jetën.
Lule rrëfen se viktima është gjetur në mëngjes nga një kalimtar. Ai shton se vëllai i tij nuk ndodhej në banesë pasi kishte udhëtuar drejt Greqisë për të festuar Pashkën me fëmijët.
“Vëllai ka ikur, ka një muaj në Greqi tek fëmijët. Do kalonte pashkët dhe do vinte. Unë para dy ditësh isha këtu, kontrollova dhe nuk kishte gjë. Por kaloi një komshi këtu dhe sot në mëngjes kishte gjetur një person në dritare. Me vrap njoftoi policinë, njoftoi dhe vëllanë. Vëllai më mori mua sepse kisha çelësat. Erdha këtu. Policia bëri verifikimet. Personi kishte thyer xhamin por s’kishte gjetur gjë. Kishte ardhur më pas te dritarja e shtëpisë dhe xhamat aty janë të vegjël. Ai ka tentuar të futej aty dhe ka ngecur gjysmë trupi, as nuk dilte as nuk hynte dot. Personi që kaloi këtu në mëngjes e gjeti grabitësin të vdekur të varur te xhami.
Personi që tentoi të hynte në banesë dhe u gjet i pajetë mund të ketë qenë dikur te 35-vjeç”, deklaroi për mediat vëllai i pronarit të banesës.
