I ftuar në emisionin Dekalog nga Roland Qafoku në DritareTV, ish-ambasadori dhe ish-drejtori i SHISH, Visho Ajazi , diskutoi një nga momentet më të rëndësishme të historisë ushtarake të Shqipërisë.
Visho Ajazi foli për një plan të supozuar të vitit 1989, kur regjimi komunist kishte përgatitur plane ushtarake për të ndërhyrë në Kosovë në rast konflikti.
Ajazi pohoi se, pavarësisht varfërisë së kohës, Shqipëria komuniste ishte një fuqi ushtarake e forte.
Ai theksoi se vendi ishte ndër më të militarizuarit në Europë, duke pasur rreth 300 mijë rezervistë aktivë, struktura të armatosura edhe në institucionet civile dhe një flotë të konsiderueshme ajrore.
“Në atë kohë, Shqipëria ishte fuqi ushtarake, ishte militar. Ne kemi qenë me 300 mijë forca, ju e dini mirë. Vetëm në Fakultetin e Shkencave kishte dy batalione artilerie… ishin ndër më cilësorët në vend.
Mos harrojmë edhe një gjë tjetër: kemi pasur 135 avionë gjuajtës ushtarakë. 135 është numër shumë i madh. Ishim një popull ushtar, siç quhej në atë kohë, dhe Jugosllavia na merrte seriozisht,” deklaroi ai në DritareTV.
Plani i vitit 1989 lidhej drejtpërdrejt me tensionet e asaj kohe në Kosovë, kur Serbia e Millosheviçit hoqi autonominë dhe nisi represionin e hapur ndaj shqiptarëve. Sipas Ajazit, regjimi në Tiranë kishte hartuar një skenar të ndërhyrjes ushtarake nëse situata do të degradonte në masakra apo konflikt të hapur.
Edhe pse ndërhyrja nuk u realizua kurrë, fakti që një plan i tillë ekzistonte tregon nivelin e alarmit dhe rolin që ushtria shqiptare kishte në atë periudhë.
Ajazi theksoi se ky episod historik ndihmon për të kuptuar fuqinë ushtarake të Shqipërisë para viteve ’90 dhe se si Jugosllavia, pavarësisht përmasave, e mbante në analizat e saj.
