Gazeta italiane “Il Mattino” i ka marrë një intervistë kryeministrit te Shqipërisë, Edi Rama, duke e cilesuar si një lidër që solli shpresë për kryeqytetin si kryetar bashkie për Tiranën dhe shpresë si kryeministër se Shqipëria do të jetë shpejt në Evropë.
Në krye të radhës së intervistës për “Il Mattino” citohet se “Edi Rama vjen si kryetar i bashkisë së Tiranës qe ka pikturuar qytetin me ngjyra të forta të Mesdheut për te dhënë shpresë për qytetarët e tjerë. Ndërsa si kryeministër i Shqipërisë, Edi Rama vazhdon të ketë shpresë se vendi i tij do të jetë së shpejti pjesë e Europës, ëndrrës së atyre që u rriten gjatë regjimit komunist fshehurazi duke ndjekur televizionin italian, në një kohë kur këndonin një këngë të Celentanos, te rinjtë shkonin direkt në burg”.
Në intervistë, Rama theksoi se Evropa ka humbur në egoizëm dhe se sot BE është më shumë taktike dhe më pak strategjike. Ndërsa për krizën e emigrantëve në Mesdhe, ai vë në pah hendekun dramatik që ekziston në Evropë, qe prej kohësh ka humbur në egoizëm, nacionalizëm, taktika politike dhe elektorale, që konsumohen në vende të veçanta anëtare në BE.
Pyetjes nëse sot Evropa është më pak përkrahëse, kreu i qeverisë shqiptare i përgjigjet: “Do të thoja se ka një mungesë në rritje të gatishmërisë për të respektuar vlerat autentike. Më pak strategjike dhe më shumë taktike, viktimë e vetë-interesit për shkak të llogaritjeve të brendshme të kombeve të veçanta”. Në vijim të intervistës, kryeministri Rama i pyetur nëse Shqipëria ende është e interesuar për të qenë pjesë e Bashkimit Evropian, ai thotë se pavarësisht kësaj situate që po ndodh me emigrantët, projekti për në BE është i madh dhe nuk lidhet vetëm me një periudhë historike. “Aspirata evropiane nuk është e lidhur me një periudhë të caktuar historike, por është një projekt i madh, ndoshta ëndrra më ambicioze që njerëzimi ka qenë në gjendje të krijojë”, thekson kryeministri Rama.
Ndërsa për tragjedinë që po ndodh në Mesdhe me emigratët, Rama eshte shprehur se “Tragjedia që po ndodh në Mesdhe sigurisht nuk është një arsye për të braktisur projektin, por mundësi për të rinisur një Evropë që shkon përtej financave, idesë se një numër shtetesh janë bashkë vetëm për arsye ekonomike dhe komoditet individual”.
