Avokati i Ylvi Beqajt sqaron të gjithë kalvarin e proceseve gjyqësore për ish-hotel Vollgën dhe kontratat me Emiljano Shullazin tashmë i arrestuar për disa akuza.
Roland Samarxhiu në një interviste për “AbcNews”, shprehet se, Shullazit i kishin kërkuar ndihmë pasi administrata gjyqësore nuk po zbatonte ligjin dhe vendimet e gjyqësorit. Ai thotë se në një shtet ku nuk respektohet ligji dhe rregulli, mbizotërojnë të fortët dhe krimi.
Vetë Beqja nuk pranoi të fliste, por ndoqi nga afër të gjithë intervistën e avokatit.
Zgjidhja e problemit nga Shullazi
Pas 14 vitesh nëpër Gjykata, Ylvi Beqaj e gjeti zgjidhjen e halleve të tij tek Emiliano Shullazi. Paratë për truallin dhe ish-Hotel Vollgën në Durrës ishin paguar, por gjykata ishte duke ia marrë pronën për t’ia kaluar palës tjetër në konflikt.
“Ylvi Beqaj është njohur me Emiliano Shullazin prej shumë kohësh se kanë qenë komshinj. Në një moment kafeje siç pyesim ne shqiptarët, i ka thënë: Më ka gjetur belaja! Kam marrë vendimin për ta regjistruar pronën, nuk ma regjistron zyra e regjistrimit e pasurive të paluajtshme. Ça po thua? Ja këtë po them, s’po ma regjistrojnë. E kam çuar edhe për përmbarim. Të përpiqem unë? Po a ke gjë në dorë?”.
“Do merrte dy gjëra Emiliano: Do interesohej që të regjistrohej kjo pronë që e kishte përmbaruesi, kishte çuar shkresat, kërcënimet që lejon ligja dhe e dyta ishte, do bisedonte me Zanmir Hasën. Tani kjo punë mbaroi. Është e vërtetuar. Do mbyllte punën me Zanmirin që mos vazhdonin gjyqet pafundësisht, se vajtën kaq vjet. Këto ishin detyrat. Meqë jemi në ekonomi tregu, hyri kjo tjetra: Mirë do i bëj unë këto, po ça do marr unë? Dhe u la që nëse zgjidhte problemin me regjistrimin merrte 10%, nëse zgjidhte problemin me gjykatën merrte 10% të tjera, që shkonte 20%”, shprehet avokati.
“Po të flasim që shteti do punonte tamam siç duhej nuk do ishte puna për Emiliano Shullazin. Por ama Ylviu ia njeh për nder atij. Se nuk mund ta ndajë tani. Si? Kush e bëri? Shkon përmbaruesi, i thotë kryeregjistruesit: Ore bëje se do të të jap gjobën, do të të çoj në burg, ai nuk e bën. Nuk po gjente zgjidhje një vendim i dhënë nga Gjykata, që duhej të zgjidhej përmes rrugëve zyrtare dhe jo të tjera. Meqë nuk po gjente zgjidhje e kërkonte. Kjo është e keqja në Shqipëri”, tha avokati i Ylvi Beqajt.
