Ngjarja tragjike e ndodhur disa vite me parë në familjen Myftari nga fshati Vlosht në Roskovec ku kryefamiljari Fatmir Myftari ka vrarë bashkëshorten e tij shtatzënë ka lënë jetimë 5 fëmijë. Ai u dënua me 25 vite burg, por më pas vari vetën.
Por pas kësaj ngjarje 5 fëmijët e kësaj familje jo vetëm që kanë mbetur pa prindër, por edhe pa shtëpi.
Xhaxhai që i kishte marrë nën kujdestari dhe i mbante në shtëpi, ka ndërruar jetë. Dy vajzat e mëdha të familjes janë martuar, ndërsa 3 fëmijët më të vegjël kanë mbetur në qiell të hapur.
Bashkia e Roskovecit i kishte futur në listën e të pastrehëve, por kohët e fundit ka filluar edhe ndërtimin e një strehe për këta 3 fëmijë. Banorët e fshatit janë solidarizuar duke ndihmuar në ndërtimin e shtëpisë për 3 fëmijët jetim, ku më i madhi i tyre është vetëm 18 vjeç.
Bashkia e Roskovecit është duke kontribuar me bazën materiale ndërsa banorët e fshatit Vlosht punojnë falas për ndërtimin e shtëpisë.
Pas 10 vitesh të jetuara në kushte të vështira edhe 3 jetimet e familjes Myftari do të kenë strehën e tyre./a.m.
