Samiti i dytë mes presidentit të SHBA-ve Donald Trump dhe presidentit rus Vladimir Putin duket i pamundur të zhvillohet së shpejti, pasi takimi paraprak mes Sekretarit amerikan të Shtetit Marco Rubio dhe Ministrit të Jashtëm rus Sergej Lavrov, i planifikuar për këtë javë, është pezulluar përkohësisht. Lajmin e ka konfirmuar një zyrtar i Shtëpisë së Bardhë për CNN.
Sipas burimeve pranë çështjes, pas një telefonate mes dy ministrave Rubio dhe Lavrov, zyrtarët amerikanë kanë vlerësuar se pozicioni rus nuk ka ndryshuar nga kërkesat maksimaliste, duke e bërë të pamundur për momentin organizimin e një samiti të ri. Megjithatë, Rubio dhe Lavrov mund të zhvillojnë një tjetër bisedë këtë javë.
Të enjten e kaluar, pas një telefonate me Putin, Trump kishte deklaruar se të dy liderët do të takoheshin brenda pak javësh në Budapest, Hungari. Ai kishte njoftuar gjithashtu se këtë javë do të mbahej një takim mes këshilltarëve të nivelit të lartë, i udhëhequr nga Rubio. Por që sipas CNN, gjithçka është pezulluar.
Shtëpia e Bardhë nuk ka dhënë ende një koment zyrtar. Zëvendës-zëdhënësja Anna Kelly tha për CNN: “Presidenti Trump ka punuar vazhdimisht për të gjetur një zgjidhje paqësore dhe diplomatike për t’i dhënë fund kësaj lufte të pakuptimtë dhe për të ndalur vrasjet. Ai ka angazhuar me guxim të gjitha palët dhe do të bëjë gjithçka për të arritur paqen.”
Zëvendësministri i Jashtëm rus Sergej Rjabkov deklaroi nga Moska se është “e parakohshme” të flitet për një afat për takimin mes ministrave Lavrov dhe Rubio, pasi kërkon “përgatitje të gjatë”.
Ai shtoi se “nuk mund të shtyhet diçka që nuk është dakorduar ende”, duke akuzuar vendet e Bashkimit Europian dhe NATO-s për përpjekje për të penguar çdo zhvillim.
“Nuk ka asnjë çështje që nuk i intereson, përveç se si të dëmtojnë Rusinë, të minojnë pozicionet tona dhe të na e bëjnë më të vështirë zgjidhjen e problemeve që përballemi. Ky është qëllimi i vetëm i politikës së BE-së. Janë forca më shkatërruese në skenën ndërkombëtare. Prandaj, nuk është për t’u habitur që merren me çdo lloj sabotimi. Ne jemi të përgatitur për këtë dhe dimë si ta përballojmë,” tha Rjabkov për agjencinë e lajmeve Tass, duke iu përgjigjur pyetjes mbi rrezikun e anulimit të samitit Trump–Putin.
