Kryetari i Kolegjit të Posaçëm të Apelimit (KPA), Sokol Çomo, deklaroi sot se procesi i rivlerësimit kalimtar të gjyqtarëve dhe prokurorëve është drejt fundit, me më pak se tetë muaj të mbetur deri në përfundimin e tij në qershor 2026.
Në fjalën e tij, Çomo theksoi se reforma në drejtësi, e nisur në vitin 2016 me ndryshime kushtetuese dhe ligjore, dhe e mbështetur nga ekspertiza ndërkombëtare dhe opinionet e Komisionit të Venecias, ka hyrë në fazën e saj përmbyllëse.
Sipas tij, KPA ka shqyrtuar deri tani 370 nga 417 ankime të depozituara, duke lënë në proces edhe 48 ankime të tjera, të cilat pritet të përfundohen brenda afatit kushtetues.
“Tipologjia e ankimeve: 293 nga ankimet i përkasin subjekteve të rivlerësimit; 120 ankime u paraqitën nga komisionerët publik; 4 ankime u paraqitën në mënyrë të njëkohshme.
Deri në momentin aktual KPA ka gjykuar 370 ankime nga 417 në total duke i ngelur për të shqyrtuar edhe 48 ankime deri në mesin e qershorit të 2026.
Nga këto 48 ankime, 16 i përkasin subjekteve të rivlerësimit gjyqtar; 23 i përkasin subjekteve të rivlerësimit prokuror; 9 ankime subjekteve jo magjistratë (inspektor, këshilltarë ligjorë, ndihmësa ligjorë).
Deri në përfundim të procesit 39 magjistratë presin të kenë vendim përfundimtar nga KPA”, sqaroi Çomo.
Ai vuri në dukje se vëllimi i lartë i çështjeve për shqyrtim në këtë fazë të fundit të procesit erdhi si pasojë e mosparashikimit të depozitimit të ankimeve deri në dhjetor 2024, kur fillimisht ishte planifikuar që pas mbylljes së veprimtarisë së Komisionit të Pavarur të Kualifikimit (KPK), KPA të kishte një periudhë 4-vjeçare vetëm për shqyrtimin e ankimeve ekzistuese.
“417 ankime përfaqësojnë mbi 50% të vendimeve të marra nga KPK, duke reflektuar një volum të madh pune për Kolegj. Ndër to, 293 janë paraqitur nga vetë subjektet e rivlerësimit, 120 nga komisionerët publikë, ndërsa 4 janë depozituar në mënyrë të njëkohshme nga të dyja palët”, tha Kryetari i KPA-së.
Çomo rikujtoi se mandati i Kolegjit të Posaçëm të Apelimit, ndryshe nga Komisioni i Pavarur i Kualifikimit, nuk u zgjat, duke mbetur në afatin 9-vjeçar të përcaktuar në Kushtetutë që nga momenti i krijimit të tij në vitin 2017.
Në përfundim, ai theksoi rëndësinë që procesi të përmbyllet me profesionalizëm dhe integritet, duke garantuar besueshmëri në sistemin e drejtësisë së re shqiptare.
