Marjana Çmetën e reja e cila vrau vjehrrën e më pas u rrëfye te hoxha, doli sot përpara trupës gjykuese. Por mungesa e Prokurorit Besnik Muçi, i emëruar së fundi nga Presidenti si anëtar i Gjykatës Kushtetuese u bë shkak për shtyrjen e procesit gjyqësor. Gjykata nuk është njoftuar ende për prokurorin zëvendësues, ndërkohë edhe avokatët mbrojtës kanë kërkuar kohë pasi kanë nisur disa kërkesa, por ende nuk kanë marrë përgjigje nga institucionet. E pranishme në seancën e sotme ishte Marjana Çmeta, si edhe ish bashkëshorti i saj, Oltjon Lami në cilësinë e trashëgimtarit të viktimës.
Marjana Çmeta akuzohet për vrasje për shkak të marredhënieve familjare. Seanca e radhës, ku pritet të bëhet mbrojtja dhe të jepet vendimi, do të mbahet me 4 nëntor ora 9:00.
Prokuroria ka kërkuar 35 vite burg pasi ligji nuk lejon që gratë të dënohen me burgim të përjetshëm.
Ngjarja
Vrasja ka ndodhur në datën 30 prill të 2017-ës. Në atë kohë, Çmeta ishte tetë muajshe shtatzënë dhe mendonte si ta mbyste vjehrrën. Marrëdhënie jo e mirë që kishte me Lirien aso kohe 47-vjeçe që mendonte se ishte pikërisht ajo shkaktarja që martesa e saj nuk po shkonte mirë.
Pas vrasjes ajo është rrëfyer te hoxha, ku ka zbuluar se çfarë ndodhi atë ditë, ndërsa lutej që ajo të vdiste dhe të mos merrej vesh e vërteta.
Gjithashtu, në këto biseda, e reja ka treguar se si e joshi vjehrrën ta pinte lëngun me fostoksinë.
