Kryetari i Partisë Demokratike, Lulzim Basha, deklaroi sot se në nderim të 20 shkurtit 1991, do të zhvillojmë një sërë aktivitetesh përtej politikës për të kuptuar thelbin e vërtetë të këtyre ngjarjeve të mëdha historike, që në fak duhet t’i zhvillonte qeveria, pasi paguhet nga taksat e qytetarëve shqiptare.
Kryetari i Partisë Demokratike, Basha, mori pjesë në një takim të organizuar nga “Forumi për Liri dhe Demokraci”, ku në fokus ishte 20 shkurti i 1991, dita e rrëzimit te bustit të diktatorit Hoxha në Tiranë.
Basha në fjalën e tij, tha se “Përtej grevës së urisë e përtej kujtimit të një ekspozite me një instalacion artistik në Muzeun Kombëtar, e cila do të qëndrojë hapur për 48 orë, aktivitete që duhet t’i takonin qeverisë që paguhet nga taksapaguesit shqiptarë për të kujtuar këto momente të rëndësishme të shqiptarëve, por që i kanë lënë edhe këtë 25 vjetor ne një harresë të qëllimshme”.
“Diskutimi i sotem është një diskutim jo partiak, që synon dhe besoj se do t’ia arrije të afrohet sa më shumë me thelbin e vertetë të 20 shkurtit 1991. Nuk ishte një përplasje e verbërt me disa qindra kilograme bronz, por ishte shumë më shumë se kaq”, tha Basha.
Nga ana tjetër, kryeopozitari Basha tha se Shqipëria ka nevojë për kultin e individit. “Së treti, dua të them që për mua ky eveniment dhe mënyra e organizimit përbëjnë një risi e cila ka për qëllim të eksplorojë në një dialog me pjesëmarrësit këtu në sallë por edhe me publikun që na ndjek përmes medias, domethënien e atij akti 25 vite më parë dhe të eksplorojë përtej domethënies edhe investimin që ai akt, shembja e simbolit të diktaturës duhet të përbëjë për brezat dhe për sfidat me të cilat Shqipëria po ndeshet sot e do të vazhdojë të ndeshet derisa të kultivojë kultin e individit.
Sepse Shqipëria ka nevojë për kultin e individit, jo për kultin e individit diktatorial, jo për kultin e individit që shembëm 20 vite më parë, jo për simbolin e “njeriut diell” nga e cila varet ekzistenca e çdo robi e çdo skllavi e çdo proletari e çdo demokrati apo çdo socialisti. Jo kultin e individit për të cilin duhet të thërrasim “Rroftë udhëheqësi i partisë!”, sa herë marrim në dorë tapitë e legalizimit apo na kthehen si shërbime taksat që na merren nga xhepat tanë. Por për kultin e individit të lirë, e individit të lirë pa të cilin demokracia mbetet një formalitet. Individ të lirë, këtij tipari, këtij identikiti të demokracisë perëndimore cili është aksioneri i vërtetë i shtetit, si kontratë, i demokracisë, i individit që e kupton se shteti nuk disponon asnjë mjet sepse të gjitha mjetet burojnë nga individi.”, theksoi Basha. Ndër të tjera Basha tha se paratë që shteti destinon janë paratë e taksave që paguan individi. “Të drejtat që shteti mbron janë të drejtat natyrale dhe hyjnore të individit. Liritë që shteti duhet të garantojë janë liritë natyrale të individit dhe aspiratat që shteti duhet të investojë janë aspiratat legjitime të individit.
Pra, kultit të qytetarit të lirë i cili në demokraci nuk është thjeshtë vlerësuesi me votë një herë në katër vite i qeverisjes por është dhe do të jetë dhe gardiani i qeverisjes, i cili nuk ka nevojë as të thërritet as të stimulohet për protestë por i prin protestës sa herë që keqqeverisja e lë në baltë, e kërcënon apo ç‘është me e keqja e rikthen në kohët e errëta kur e trajton ri rob, si skllav, si qenie që duhet të jetë i lumtur që i shtrëngon dorën udhëheqësit, për të marrë tapinë e legalizimit që i takon.”, tha Basha.
