Gjykata e Tiranës ka rrëzuar sot, 2 prill, masën e sigurimit të pezullimit nga detyra të kreut të IMT-së në kryeqytet, Rigers Sheqeri.
Kështu raporton gazetarja e Klan News, Glidona Daci.
Masa u caktua vetëm 2 ditë më parë, ndërsa Prokuroria e Tiranës e akuzon atë për “shpërdorim detyre”.
“Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Tiranë u caktuan masat e sigurimit ‘Pezullim i ushtrimit të një detyre a shërbimi publik’ për shtetasit E.P. dhe R.Sh nën akuzë për veprën penale ‘Shpërdorim detyre’ parashikuar nga nenet 248 e 25 të Kodit Penal. Ndërsa për shtetasin P.C., i dyshuar për kryerjen e veprës penale ‘Ndërtim i paligjshëm’, u kërkuan masat e sigurimit ‘Ndalim i daljes jashtë shtetit’ dhe detyrim për t’u paraqitur në policinë gjyqësore parashikuar nga neni 199/a, prg.3 i Kodit Penal”, ka njoftuar më herët Prokuroria.
Bashkë me Sheqerin është pezulluar edhe drejtori juridik në këtë institucion, ndërsa për një biznesmen të dyshuar për “ndërtim të paligjshëm” është kërkuar ndalimi i daljes jashtë vendit.
Masat u morën pas kallëzimit të bërë nga administratori i një shoqërie, i cili pretendoi se në pronën e saj janë kryer punime që kanë sjellë si pasojë dëmtimin e saj, si dhe punime ndërtimi pa leje.
