Gjykata e Lartë e Shqipërisë ka lënë në fuqi këtë të martë masën e sigurisë arrest në burg për kryeartin e Bashkisë së Tiranës, Erion Veliaj.
Apeli kishte vendosur më 13 mars 2025 lënë në fuqi të vendimit të Gjykatës së Posaçme të Shkallës së Parë për Korrupsionin dhe Krimin e Organizuar e Shqipërisë (GJKKO).
Avokati Ili Gërdupi, i ftuar në emisionin “Opinion” në Tv Klan, theksoi se për të analizuar më mirë vendimin e Gjykatës së Lartë, së pari, duhet parë arsyetimi i vendimit.
Avokat i kryebashkiakut të Tiranës, Plarent Ndreca u shpreh se Veliaj i ushtron kompetencat e tij, por brenda kornizave që i lejojnë rrethanat e paraburgimit.
“I ushtron, por brenda kornizës që i lejon të qenurit pas hekurave. Ai nuk takon deputetë, politikanë, as funksionarë dhe as stafin. Firmos nëpërmjet korrierit që i çojnë nga sekretari i përgjithshëm, nënkryetarët dhe nëpërmjet meje. Sigurisht që është i kufizuar. Ai takon vetëm avokatin, nënën e vet, gruan dhe dy fëmijët e tij. Nuk ka takime të përditshme pune me stafin”, tha ai.
Ai theksoi se do pritet njëherë zbardhja e arsyetimit të vendimit të Gjykatës së Lartë, ndërsa më pas shpjegoi dhe dy rrugët që do ndjekin.
“Kemi mundësi apelimi, patjetër. Ne do e vlerësojmë, sepse ne do e shikojmë arsyetimin. Bazuar në arsyetimin kemi dy mundësi teorike: ose të shkojmë në Gjykatën e Strasburgut ose në Gjykatën Kushtetuese menjëherë. ky vendim, gjëja e parë që bën është e shfuqizon efektshmërinë e vendimit të gjykatës kushtetuese”, tha avokati i Veliajt.
Kryebashkiaku Veliaj është arrestuar më 10 shkurt 2025, i dyshuar sipas autoriteteve për korrupsion dhe pastrim parash dhe aktualisht ndodhet në paraburgim.
