Gjykata Antikorrupsion liroi Enio Meçaj, i cili ishte arrestuar në muajin qershor si bashkëpunëtor i Artan Tafanit, sot i penduar i drejtësisë.
Meçaj kishte ndihmuar Tafanin për fshehjen e disa provave në një garazh në Tiranë, mbasi ky i fundit kreu vjedhje në një exchange në Tiranë.
Mecaj ishte prangosur për akuzën “veprime që pengojnë zbulimin e të vërtetës”, dhe sipas prokurorit Dibra vepra për të cilën është nën hetim nuk paraqet rrezikshmëri.
Sakaq Artan Tafani, njohur ndryshe edhe si Marius Tafani për të cilin u ra në gjurmë mbasi grabiti 40 mijë eurot, vazhdon nën programin e mbrojtjes së drejtësisë duke qenë se ka rrëfyer një seri krimesh të kryera midis viteve 2019 – 2021 nga grupi kriminal i Laert Haxhisë.
Njëherazi Laert Haxhia 32-vjeç ka edhe një masë tjetër sigurie “arrest me burg” mbasi prokuroria e Fierit e akuzon për vrasjen e Besnik Hidës, vrarë në Lushnjë në vitin 2019.
/f.s
