Publikohet foto e Bledar Jambellit, personit që porositi vrasjen e komisar Artan Cukut vitin e kaluar. Ekzekutori i komisarit, Mikel Shallari tregoi pak kohë më parë se ishte Bledar Jambelli ai që e kishte porositur vrasjen.
Fotoja e siguruar nga Report Tv është bërë nga Jambelli pak kohë para se të vritej komisari. Jambelli kishte qenë në fillim të vitit të kaluar në Shqipëri dhe pasi kishte porositur vrasjen u largua jashtë vendit.
Ai i dha Shallarit shumën prej 3 mijë eurosh si parapagim, ndërsa pjesën tjetër i kishte premtuar që do ia jepte pas ekzekutimit të Cukut. Jambelli dyshohet se fshihet në Spanjë dhe në Greqi për shkak të rrjetit që kishte ngritur në këto dy vende.
Bledar Jambelli porositi vrasjen e Cukut për shkak të arrestimit që komisari i kishte bërë në vitin 2012 në Vlorë si të dyshuar për dy vrasje, por që më pas u lirua nga gjykata për mungesë provash.
Dosja që vrau Artan Cukun
Përplasjet e grupeve rivale të Vlorës për trafikimin e drogave në Spanjë rezulton se është dosja e ri hapur nga ish kryepolici Artan Cuku që çoi në kërcënimin me jetë ndaj tij e disa vite më pas ekzekutimin.
Në vitin 2012 Cuku rezulton se në krye të policisë së Vlorës do të rihapte hetimet për një atentat të trefishtë ndodhur në vitin 2006 në vendin e njohur si “Pusi i Mezinit”.
Në këtë atentat mbeti i vrarë Shpëtim Muka, Ervis Shehu dhe i plagosur Edvin Zanaj. Ky atentat asnjëherë nuk çoi në pranga një person pasi dhe arrestimi i Bledar Jambellit u rrëzua në gjykatë për mungesë provash.
Seria e krimeve në Spanjë sipas zyrtarëve të policisë së atyre viteve lidhej me atentate të ndodhura më parë edhe në vitin e mbrapshtë 1997 kur nisi dhe krijimi i grupeve kriminale.
21 vite nga atentatet që krijuan hasmëritë në Spanjë sërish risjellin emrin e Bledar Jambellit i cili fitoi lirinë nga drejtësia dhe dyshohet se kontaktoi Mikel Shallarin për të vrarë Artan Cukun. raport.tv
