Në pikën e përbashkët kufitare të Morinit, fluksi i lëvizjeve të qytetarëve dhe mjeteve është pothuajse i njëjtë si gjatë fundjavës, por edhe në ditët e zakonshme. Mesa duket, qytetarët e Kosovës po shfrytëzojnë ditët e mbetura të këtij sezoni veror për të pushuar në bregdetin shqiptar.
Edhe mëngjesi i kësaj të marte nisi me fluks të lartë lëvizjesh nga Kosova drejt Shqipërisë. Pavarësisht aplikimit të procedurës së thjeshtuar të kalimit të kufirit pa kontrolle për të gjitha mjetet me targa të Shqipërisë dhe Kosovës, herë pas here vihen re kolona të gjata deri në thellësi të territorit të Kosovës. Kjo për shkak të procedurave standarde të kontrollit për automjetet me targa të shteteve të huaja. Shumica prej tyre u përkasin shtetasve nga Kosova që jetojnë e punojnë në shtetet e ndryshme të Europës, por që kanë ardhur këtë sezon vere për të kaluar pushimet bashkë me familjet e tyre.
Një pjesë e emigrantëve i kanë mbyllur pushimet verore dhe përmes pikës kufitare të Morinit po kthehen në shtetet ku jetojnë e punojnë. Gjatë orëve të para të ditës, kanë hyrë në Shqipëri rreth 2300 automjete dhe sipas policisë kufitare fluksi më i lartë ishte mes orës 5 deri në orën 7 të mëngjesit.
Nuk ka një shifër të saktë përsa i përket qytetarëve, për shkak të procedurave të regjistrimit, gjithsesi një mesatare ditore e përafërt i kalon 25 mijë në ditët e zakonshme, ndërsa fundjavat pothuajse dyfishi i këtij numri.
Është ende herët për të bërë një bilanc krahasues me sezonin e kaluar, por gjithsesi këtë vit mendohet për një numër më të lartë hyrje-daljesh përgjatë sezonit veror, jo vetëm në pikën e përbashkët kufitare të Morinit, por edhe në pikat e tjera të kalimit kufitar mes Shqipërisë dhe Kosovës.
Këtë vit edhe Qafë Morina në Tropojë dhe Qafë Prushi në Has kanë shënuar rritje të numrit të qytetarëve në hyrje e dalje, për shkak të zgjerimit të hartave dhe guidave turistike që lidhen me rrugëkalimet drejt Parkut Kombëtar të Valbonës, Lumit të Shalës dhe Liqenit të Komanit.
