Gazetari Elvi Fundo ka reaguar në Facebook mbrëmjen e sotme duke zbuluar detaje nga sulmi i dhunshëm ndaj tij.
I shtruar në spital ku po merr ndihmën e nevojshme mjekësore, Fundo shkruan se ngjarja ka ndodhur mëngjesin e sotëm, rreth orës 10 e gjysmë.
“Dy persona me sulmuan nga pas me mjete te forta afer zyres ne ore 10 e 30. Duke me shkaktuar disa plagosje. Flm te gjitheve per mbeshtetjen dhe kurajon” – shkruan gazetari.
Sipas tij, sulmi nuk është politik. Fundo akuzon ato që ai i quan klane korruptive në media, por pa specifikuar dyshimet e tij.
“Nuk besoj qe eshte sulm politik por veper e krimit te financuar nga klane korruptive mediatike te lidhura me drogen. Inkurajoj dhe mbeshtes Policine e Shtetit per zbardhjen e ngjarjes” – shprehet Elvi Fundo në rrjetin sociale.
Ai u është lutur kolegëve të mos e bëjnë politike sulmin banditesk ndaj tij. Sipas Fundos, Rama dhe Basha nuk duhet të mbrojnë “banditët me pseudonime dhe trafikantët në media”.
“Republika e vjeter dhe e re mos mbrojne bandite me pseudonime dhe trafikante ne media… As pole që kërcejnë te Rilindja dhe ju bëhet serenate nga PD” – shkruan gazetari i cili është dhunuar ditën e sotme pranë redaksisë së portalit që drejton.
Elvi Fundo u vizitua në spital pasditen e së mërkurës nga ministri i Brendshëm Saimir Tahiri, i cili mësohet se i ka premtuar zbardhjen e ngjarjes. Më herët Partia Demokratike e ka cilësuar sulmin ndaj tij për shkak të qëndrimit kritik të Fundos ndaj qeverisë.
/javanews/b.d
