Policia Shtetit mohon akuzat e bëra sot në media se uniformat blu kanë fshehur plagosjen e një prej vëllezërve Cali në konfliktin e dhunshëm me deputetin Armando Prenga. E kontaktuar me telefon nga JavaNews.al, Policia e Shtetit mohon të ketë fshehur një fakt të tillë duke theksuar se për ngjarjen e rëndë në Laç nuk janë publikuar ende rezultatet e ekspertizës mjeko-ligjore.
Sipas Policisë së Shtetit, provat e administruara në vendin e ngjarjes i kanë kaluar Prokurorisë e cila po kryhen hetimet e saj për të zbardhur çështjen në të cilën u përfshi edhe deputeti Prenga.
“Lidhur me ngjarjen e ndodhur në Laç, priten rezultatet e ekspertizës mjeko-ligjore për të përcaktuar shkakun e plagosjes së personave të përfshirë në ngjarje. Nga ana e saj Policia e Shtetit nuk ka fshehur asnjë fakt të tillë. Policia ka administruar provat nga vendi i ngjarjes të cilat ia ka kaluar Prokurorisë, dhe është kjo e fundit e cila po kryen hetimet nga ku do të zbardhet edhe ngjarja.” tha për JavaNews.al zëdhënësi i Policisë së Shtetit Genti Mullai.
Ditën e sotme televizioni ABC News publikoi një video nga Spitali i Traumës, ku pretendohej se deputeti Prenga ka plagosur me armë dy vëllezërit Tom dhe Nikoll Cali. Sipas ABC News, në video duket qartë se të dy vëllezërit janë plagosur me armë, ndërsa policia ka dhënë njoftim për vetëm njërin prej tyre, Tom Cali.
