Nënkryetarja e Kuvendit, Evis Kushi mirëpriti në ambientet e kryesisë së Kuvendit aktivitetin e organizuar nga Instituti Shqiptar i Filmit për të Drejtat e Njeriut (IHRFFA), në kuadër të edicionit të 21-të të Festivalit Ndërkombëtar të Filmit për të Drejtat e Njeriut.
Në aktivitet, ku morën pjesë përfaqësues të trupit diplomatik, artistë dhe organizatorë të festivalit, u shfaq dokumentari “Faces of War/Fytyrat e Luftës”, me regji të francezit Didier Cros, që sjell në fokus pasojat njerëzore të luftës në Ukrainë.
Në fjalën përshëndetëse, Kushi vlerësoi aktivitetin si një traditë të rëndësishme bashkëpunimi me Akademinë e Filmit dhe Multimedias “Marubi”, duke theksuar rolin e artit dhe kinematografisë në ruajtjen e kujtesës dhe në përcjelljen e pasojave njerëzore të konflikteve.
“Kujtimi i viktimave është një përgjegjësi morale dhe paqja nuk mund të ndërtohet duke harruar dhimbjen e atyre që e kanë paguar luftën me jetën e tyre”, u shpreh Kushi.
Ajo theksoi se Shqipëria ka qëndruar dhe do të vijojë të qëndrojë në solidaritet me popullin ukrainas, në mbështetje të sovranitetit dhe integritetit territorial të Ukrainës dhe të një paqeje të drejtë e të qëndrueshme.
Aktiviteti u përshëndet edhe nga Yuliia Gorokhovska, sekretare e parë në ambasadën e Ukrainës në Shqipëri dhe Kujtim Çashku, drejtor ekzekutiv i IHRFFA.
