Rrjeti i Grupeve të Grave të Kosovës, Open Data Kosovo dhe Girl’s Coding Kosova, kanë bërë lansimin e aplikacionit për telefoni të mençur “Ec Shlirë”, i cili do të bëjë të mundur raportimin e ngacmimit seksual në Kosovë.
Por ky aplikacion fillimisht është lëshuar vetëm për ata që përdorin Android, por pritet që së shpejti që jetë në disponim edhe për telefonat tjerë të mençur.
Pjesa dërrmuese e sallës për konferenca në hotel “Sirius” ku është mbajtur ky aktivitet është mbushur me femra. Kjo pasi që nga sot femrat e Kosovës do të kenë mundësi të raportojnë ngacmimet seksuale më lehtë dhe më shpejtë nëpërmjet smartphon-ve të tyre.
Aktivistja e shoqërisë civile Igballe Rogova tha kjo ide ka ardhur pas fushatës kundër ngacmimeve seksuale “Take the Back Night”. Ajo gjithashtu përmendi raportin i cili u publikua para disa ditës nga Rrjeti i Grave të Kosovës ku doli të jetë se 48 përqind të qytetarëve të Kosovës kanë përjetuar ngacmim seksual por vetëm dy prej respodentëve kanë raportuar atë te autoritetet.
Ambasadori i Kanadasë në Kosovë Daniel Maksymiuk, i cili ishte edhe donatorë në këtë projekt tha se ky projekt adreson shumë çështje kulturore por edhe ndërton marëdhënie të forta me autoritetet e zgjedhura dhe institucionet shtetërore.
I menjëhershëm ishte edhe reagimi i Igballe Rogovës e cila shpreson që edhe Kosova të ketë një kryeministër si i Kanadasë dhe jo si ky i Kosovës, i cili para disa ditësh ka thënë se gratë e Kosovës kanë kullotur fonde nga jashtë.
Ndërsa Brain Fahey nga zyra për rritje ekonomike në USAID tha se njerëzit duhet të dhënë llogari gjithmonë për veprimet e tyre.
Blerta Thaçi nga “Girl’s Cooding Kosova” tha se ky program është pa pagesë dhe mund të shkarkohet nga gjithë ata që përdorin telefonat Android. Ajo tha se tani të gjithë mund t’i raportojnë ngacmimet seksuale brenda pak sekondash.
Thaçi gjatë kësaj konference ka treguar edhe se si instalohet dhe përdoret ky program.
Ky projekt gjatë konferencës ka gjetur përkrahje edhe nga pjesëmarrësit e tjerë prej të cilëve, përfaqësues të Apple-s në Kosovë thanë se do të bëjnë kërkesë që ky program të ofrohet edhe për ISO.
Ky projekt ka gjetur mbështetje edhe nga Policia e Kosovës. Tahire Haxholli nga Policia tha se do të ofrohet gjithë mbështetja nga ana e këtij institucioni të sigurisë./kp/
