Presidenti i SHBA-së, Donald Trump, ka nominuar ambasadorin e ri për Shqipërinë. Bëhet fjalë për Eric Wendt, një ushtarak në pension.
Gazetari Mentor Nazarko, i ftuar në emisionin “Off the Record” me Andrea Danglli në A2 CNN, e cilësoi këtë zhvillim si pozitiv për rajonin, pasi nominimi vjen në një moment kur SHBA ka mungesë ambasadorësh në disa vende të Ballkanit.
“Kjo është mbushja e një boshllëku që është krijuar në administratën Trump për Ballkanin, ku praktikisht mungojnë ambasadorë në vende si Shqipëria, Maqedonia e Veriut, Mali i Zi, Serbia dhe Bosnja. Kështu që është lajm i mirë që po plotësohen këto pozicione,” u shpreh Nazarko.
Ai theksoi se profili i Wendt është më pranë botës ushtarake sesa diplomacisë tradicionale, duke e lidhur këtë zgjedhje me stilin e administratës Trump.
“Duket si pjesë e politikës së shpërblimeve të presidentit Trump ndaj figurave që kanë pasur rol kyç gjatë presidencës së tij të parë, përfshirë edhe çështje si konflikti Izrael-Palestinë,” tha ai.
Nazarko shtoi se emërimi i një ambasadori të posaçëm për Shqipërinë largon edhe shqetësimet se SHBA mund të mbulonte rajonin me një përfaqësim të vetëm diplomatik.
“Ka pasur frikë se kjo administratë, për të kursyer burime, mund të kishte një ambasador për gjithë Ballkanin. Prandaj është lajm i mirë që do të ketë një ambasador të dedikuar për Shqipërinë,” përfundoi ai.
