SPECIALE JAVANEWS/ Lëvizjet e deputetëve në Kuvend nga opozita drejt pozitës dhe anasjelltas, nuk janë një dukuri e re për Parlamentin shqiptar. Brenda kësaj logjike duket se është edhe lëvizja më e fundit e kryetarit të PBDNJ-së, Vangjel Dule, i cili është zgjedhur deputet me votat e mazhorancës, në drejtim të PD-së. Vetëm pak ditë më parë dy liderët e PD-së, Basha dhe Berisha, kanë denoncuar atë që ata e vlerësojnë si “shitblerje të deputetëve të opozitës nga ana e mazhorancës”.
Këtyre artikulimeve, në mënyrë pak të pazakontë, iu bashkua edhe Presidenti i Republikës, Bujar Nishani. Nuk është e qartë nëse e njëjta logjikë vlen edhe në rastin e Dules, i cili kalon nga pozita në opozitë, duke takuar në selinë e PD-së kryetarin Basha. Një kalim i Dules në opozitë duket punë e mbaruar, po të kihet parasysh dhe vendi i takimit që ai zgjodhi.
Si nisi “hemoragjia” parlamentare
Por lëvizja e Dules duket se është rasti më i fundit në morinë e rasteve, ku deputetët ndërrojnë kahje duke kaluar sa tek pozita sa tek opozita, pavarësisht se për cilin koalicion kanë garuar. Në parlamentin e zgjedhur në vitin 2013, siparin e këtyre lëvizjeve e hapi i pari deputeti Gjovalin Kadeli, i cili u largua nga grupi i PD-së për t’iu bashkangjitur grupit parlamentar të LSI-së. Sipas Kadelit, duke qenë se gjeneza e tij është e majtë, lëvizja drejt LSI-së ishte krejt normale. Ende pa u kapërdirë shija e hidhur e largimit të Kadelit, një tjetër largim vjen nga rradhët e opozitës. Këtë herë është deputeti nga kampi republikan, Ylli Shehu, i cili edhe ai lë opozitën dhe i bashkangjitet LSI-së. Por edhe nga PS-ja nuk mungojnë kërcënime për largim. Në prag të zgjedhjeve vendore, deputeti i PS-së, Vladimir Kosta, deklaron largimin nga PS-ja në shenjë proteste ndaj LSI-së për kandidatin për Bashkinë e Përmetit.
“Të peshkosh” deputetë në ujëra të turbullta
Në kulmin e debateve dhe akuzave për shitblerje, nga opozita largohen edhe dy subjekte parlamentare, ai i PDIU-së së Shpëtim Idrizit me 5 deputetë dhe i PDK-së, së Nard Ndokës, me një deputet. PDIU-ja tashmë është e përfshirë në koalicion qeverisës. Ndërsa Ndoka ka mbajtur një pozicion më neutral në raport me PS. Por largimi i PDIU-së dhe PDK-së nga opozita nuk do të shënonte fundin e largimeve të deputetëve nga forcat politike që ato i kanë zgjedhur. Mesila Doda, një zë i fortë brenda PD-së, vendosi të braktisë grupin e saj parlamentar të PD-së, dhe t’i bashkangjitet PDIU-së. Sipas saj, arësyeja ishte se “mungon çdo lloj komunikimi e bashkëpunimi reciprok me lidershipin e PD-së dhe se ndjehem e përjashtuar de facto nga veprimtaritë politike si deputete brenda PD-së”.
Duke parë lëvizjen e fundit të Dules drejt PD-së, tashmë bëhet e qartë se loja do të vazhdojë edhe me lëvizje të tjera. Ajo që të paktën duket se nuk qëndron më si alibi për PD-në është fakti se jo të gjithë marrin deputetë nga oborri i opozitës, pasi edhe ajo di të “peshkojë” në ujërat pak të turbullta tashmë të mazhorancës.
(javanews. al) Me. Ar
