Kancelari gjerman Friedrich Merz, ishte të premten në Uashington për vizitën e tij të parë në Shtëpinë e Bardhë.
Gjatë takimit, Merz i ka dhuruar presidentit Donald Trump një kopje të certifikatës së lindjes së gjyshit të lindur në Gjermani të Trump, duke e ftuar udhëheqësin amerikan të vizitojë tokat e tij stërgjyshore.
I lindur në vitin 1869 në atë që atëherë ishte pjesë e Mbretërisë së Bavarisë, Friedrich Trump u rrit në Kallstadt, një fshat i fshehur në luginat e harlisura të vreshtave që rrethojnë lumin Rajn, në jug të Frankfurtit.
Gjyshja e Trump nga ana e babait, Elisabeth, u lind përballë shtëpisë së Trump në Kallstadt në vitin 1880.
Merz zhvilloi një telefonatë të parë me Trump menjëherë pas marrjes së detyrës në fillim të majit, gjatë së cilës ai tha se e kishte ftuar presidentin të vizitonte Gjermaninë, një ftesë që ai tani e ka bërë publikisht.
Gjyshi i Trumpit vinte nga një familje e thjeshtë, dhe ishte njëri nga gjashtë fëmijët e një vreshtari. Pas shkollës ai mësoi profesionin e berberit.
Në vitin 1885, në moshën 16-vjeçare e braktisi vendlindjen me shpresën për një jetë më të mirë në Shtetet e Bashkuara të Amerikës. Ishte një kohë kur më shumë se 100.000 gjermanë merrnin rrugën e kurbetit me ëndrrën për një jetë më të mirë.
Më vonë ai kërkoi të kthehej në Kallstadt, por zyrtarët vendas refuzuan t’i jepnin leje, duke përmendur një dështim për t’u çregjistruar siç duhet kur ai u largua në vitin 1885.
Friedrich që më pas e ndërroi emrin në Frederick dhe gruaja e tij Elisabeth hipën në një anije me destinacion SHBA-në në vitin 1905, dhe babai i Trump lindi në Nju Jork vetëm disa muaj më vonë.
Gjyshi i Donald Trumpit pas ardhjes në Nju Jork e filloi jetën në pjesën perëndimore të SHBA-së, më vonë u fut në tregtinë e floririt, bleu prona, duke vënë kështu edhe bazamentin për pasurinë e ardhshme të dinastisë Trump.
Ndërsa Friedrich vdiq atje në vitin 1918, Elisabeth do të vazhdonte të jetonte një jetë të gjatë para se të vdiste në vitin 1966.
Kallstadt u bë i famshëm ndërkombëtarisht për herë të parë gjatë kandidaturës së parë presidenciale të Trump në vitin 2016, kur mediat e kthyen vëmendjen e tyre nga fshati me vetëm pak më shumë se 1 000 banorë, pas fitores së tij. Në Kallstadt çdo vit vijnë njerëz e gjithë bota për festën e verës.
