Rreth 104 mijë udhëtarë me afro 23 mijë autovetura kanë kaluar nëpërmjet portit të Durrësit gjatë periudhës 19 – 30 gusht të këtij viti. Çdo ditë nëpërmjet portit më të madh të vendit kanë lundruar me tragete mesatarisht 8.600 udhëtarë me 1.900 autovetura.
Nga burime të Autoritetit Portual (APD) mësohet se në 12 ditët e fundit tragetet janë shfrytëzuar në nisje nga 92.953 udhëtarë, shumica bashkëatdhëtarë, që pasi kanë kaluar pushimet pranë familjeve, rikthehen në vendet e Evropës Perëndimore ku punojnë dhe jetojnë.
Tragetet në nisje nga Durrësi kanë transportuar edhe 20.297 autovetura personale të udhëtarëve, si dhe dhjetra kamionë dhe trajlera me mallra të ndryshme. Mjetet e mëdha detare kanë kryer 5-7 lundrime vajtje – ardhje në ditë dhe gjatë së njejtës periudhë janë preferuar edhe nga 11.654 udhëtarë të tjerë, të cilët kanë mbërritur në Durrës nga portet e Barit, Ankonës dhe Triestes (Itali).
Vetëm në tre ditët e fundit të javës që sapo u mbyll kanë udhëtuar me tragete afro 32 mijë udhëtarë gjithsej, 95 për qind e të cilëve kanë lundruar nga Durrësi drejt porteve të Italisë.
Rikthimi me tragete drejt Italisë pritet të vazhdojë edhe gjatë kësaj jave.
