SHBA-ja ka zhvilluar plane ushtarake për t’u përballur me Korenë e Veriut, deklaroi sot kryetari i Shefave të Shtabit të Përbashkët amerikan, Joseph Dunford duke rënë pjesërisht në kundërshtim me kryestrategun e Donald Trump.
Por kryestrategu i Shtëpisë së Bardhë, Steve Bannon duket se e ka ulur retorikën e luftës në një intervistë të dhënë të mërkurën.
“Deri sa dikush të zgjidhë pjesën e ekuacionit duke më treguar se si 10 milionë persona në Seul të mos vdesin në 30 minutat e para nga armët konvencionale, nuk e di se për çfarë po flisni, nuk ka një zgjidhje ushtarake këtu”, deklaroi Bannon për “The American Prospect”.
I pyetur për komentet e Bannon, Dunford iu përgjigj reporterëve në Pekin se “presidenti Trump, drejtpërdrejtë, ka kërkuar të zhvillohen mundësi ushtarake të besueshme dhe të aplikueshme. Dhe kjo është ajo që po bëjmë”.
“Po përsëris atë që kam thënë në të kaluarë, është absolutisht e tmerrshme nëse do të ketë një zgjidhje ushtarake për këtë problem, nuk ka debat mbi këtë”, theksoi ai.
Regjimi komunist koreanoverior, që synon të ndërtojë armë atomike, javën e kaluar kërcënoi se do të lëshojë raketa drejt territorit amerikan në Paqësor, në Guam, pasi kishte testuar raketa pranë territorit të Koresë së Veriut dhe Japonisë./b.d
