Partia Québécois (PQ), forca politike që kërkon shkëputjen e Quebecut nga Kanadaja, ka dalë fituese në zgjedhjet provinciale, duke siguruar rikthimin në qeverisje pas më shumë se dhjetë vitesh.
Partia e Paul St-Pierre Plamondon do të drejtojë një qeveri të pakicës, pasi fitoi 59 mandate nga 127 gjithsej. Për të pasur shumicën parlamentare duheshin 64 vende, çka e detyron qeverinë e re të negociojë me partitë e tjera për të kaluar ligjet dhe për të mbijetuar në votimet e rëndësishme.
Në fjalimin pas fitores, ai argumentoi se Quebecu duhet të ketë mundësinë të përcaktojë vetë statusin e tij dhe e lidhi kërkesën për pavarësi me mbrojtjen e identitetit dhe kulturës frankofone të provincës.
Quebecu ka votuar dy herë më parë për këtë çështje, në vitin 1980 dhe në vitin 1995. Në të dyja referendumet, shumica vendosi që provinca të vazhdonte të ishte pjesë e Kanadasë. Në votimin e vitit 1995, diferenca mes dy kampeve ishte veçanërisht e vogël.
Humbja e zgjedhjeve përbën një goditje për Coalition Avenir Québec, e cila kishte qenë në pushtet që nga viti 2018. Liderja e saj, Christine Fréchette, pranoi rezultatin dhe tha se mban përgjegjësinë për humbjen.
Nga Otava, kryeministri Mark Carney reagoi duke uruar Plamondonin dhe duke shprehur gatishmërinë për bashkëpunim me qeverinë e re. Ai veçoi ekonominë, mbështetjen për bizneset dhe punëtorët, krijimin e vendeve të reja të punës dhe ndërtimin e banesave si fusha ku mund të ketë bashkëpunim.
Fitorja e PQ-së e rikthen çështjen e marrëdhënieve mes Quebecut dhe Kanadasë në vëmendjen politike. Provinca ka një shkallë të lartë autonomie dhe tashmë kontrollon fusha të rëndësishme si taksimi, emigracioni dhe politikat gjuhësore.
Sfida kryesore për qeverinë e re do të jetë sigurimi i mbështetjes parlamentare për të qeverisur, ndërsa në planin politik ajo synon të ndërtojë terrenin për një debat të ri mbi të ardhmen e Quebecut.
