Një 49-vjeçar i dënuar për vjedhje me pasoja të rënda, është denoncuar nga ish-bashkëshortja për kërcënimet që i bën me anë të letrave nga burgu. I dyshuari, Tom Ndoja, i cili ndodhet në Burgun 325, duke vuajtur dënimin prej 4 vjet e 6 muajsh, dyshohet se i ka shkruar vazhdimisht letra ish-gruas, duke i thënë se do ta vriste atë dhe familjen.
“Sa të dal nga këtu do të të vras ty dhe familjarët e tu”, i ka shkruar Ndoja në një prej letrave shtetases 42- vjeçare T.N. Ajo e ka denoncuar ngjarjen në Komisariatin nr.1, duke dorëzuar edhe si provë letrat kërcënuese që ai i ka dërguar.
Ndërsa ka deklaruar se letrat kanë nisur pasi Ndoja ka marrë vesh që ajo kishte depozituar në Gjykatë kërkesën për divorc. Në deklarimet e saj, e dëmtuara shprehet se ka vendosur të divorcohej nga i dënuari, në momentin që ka mësuar se ai kishte kryer disa vjedhje. Tom Ndoja është dënuar në mesin e këtij viti nga Gjykata e Tiranës me 4 vjet e 6 muaj burg për “vjedhje me pasoja të rënda”, shkruan “Panorama”.
Nga hetimet e kryera, ka rezultuar se gjatë procesit të faljes në një xhami të Tiranës, ai i ka vjedhur një besimtari çantën e dorës, në të cilën gjendeshin edhe 10 mijë euro. I dënuari ka shfrytëzuar faktin se besimtarët ishin duke kryer ritet fetare dhe ka përfituar nga mirëbesimi ndërmjet tyre, duke vjedhur vlerën e konsiderueshme monetare.
Pas vjedhjes së fundit që ka realizuar në xhami, ai është larguar, ndërkohë që është pikasur dhe është kapur disa ditë më pas nga një tjetër besimtar i xhamisë, i cili më pas ka njoftuar Policinë për të realizuar arrestimin e tij.
Gjatë hetimit dhe në procesin e gjykimit, Ndoja ka mbajtur qëndrim të dyshimtë. Ai ka deklaruar se ka pasur si qëllim që të vidhte çantën dhe nuk e ka ditur që brenda saj gjendej edhe shuma e parave./a.m.
